ପ୍ରକୃତ ହିରୋଟେ ହୁଅ

ଜୀବନଟା ଏକ ରଙ୍ଗମଞ୍ଚ,

ଅଭିନୟ ଏଠି ଲୋଡା ।

ଅଭିନୟ ଯଦି ହୁଅଇ ନିଖୁଣ,

ମିଳିଥାଏ ଫୁଲତୋଡା ।।

କିଏ ଏଠି ହୁଏ ଭିଲିଆନ୍ ପୁଣି,

କିଏ ହୁଏ ଏଠି ହିରୋ ।

ଆଉ କା ଚରିତ୍ର ଲାଗେ ଫିକାଫିକା,

ଅଭିନୟ ଥାଏ ଜିରୋ ।।

କମେଡିଆନ ଭୁମିକାରେ କିଏ,

କରେ ପୁଣି ଅଭିନୟ ।

ଆଉ କିଏ ଏଠି ଅଭିନୟ ବିନା,

ସାଉଁଟୁଥାଏ ସେ ଶ୍ରେୟ ।।

ସବୁ ଅଭିନୟ ସମାଜ ହିତରେ,

ମଞ୍ଚରେ ମଞ୍ଚସ୍ଥ ହୁଏ ।

ଅଭିନେତାଟିଏ ଅଭିନୟ ସାରି,

ଶେଷରେ ବିଦାୟ ନିଏ ।।

ମିଛ ଅଭିନୟ ହୃଦୟରୁ ତେଜି,

କର ସତ ଅଭିନୟ ।

ରିଲ୍ ହିରୋଟେ ହେବା ପରିବର୍ତ୍ତେ,

ପ୍ରକୃତ ହିରୋଟେ ହୁଅ ।।