ବନ୍ଧୁ ସଭିଙ୍କର ଲୋଡା

ମଣିଷ ଜୀବନ ମାତ୍ର ଦୁଇଦିନ 

ଦିନେ ଜନ୍ମ ଦିନେ ମୃତ୍ୟୁ ।

ଏହି ଜୀବନକୁ ମିଳଇ ପୂର୍ଣ୍ଣତା 

ବାନ୍ଧିଲେ ବନ୍ଧୁତ୍ୱ ସେତୁ ।।

ବନ୍ଧୁ ବିନା ପରା ଏଇ ଜୀବନଟା 

ଲାଗିଥାଏ ଫିକା ଫିକା ।

ବିପଦ ବେଳରେ ହୋଇଥାଏ ସାହା 

ବନ୍ଧୁ ପାଖେ ଥିଲେ ଏକା ।।

ବନ୍ଧୁତ୍ୱର ସେତୁ ଶକ୍ତ ହେବା ପାଇଁ 

ବିଶ୍ୱାସ ହିଁ ଚାବିକାଠି ।

ଅବିଶ୍ୱାସ ଯଦି ମନରେ ଜନ୍ମଇ 

ବନ୍ଧୁପଣ ଯାଏ କଟି ।।

ବନ୍ଧୁଟିଏ ସିନା ପାରିଥାଏ ବୁଝି 

ବନ୍ଧୁତ୍ୱର ପରିଭାଷା ।

ଶତ୍ରୁ କି ବୁଝିବ ବନ୍ଧୁତ୍ୱର ମୂଲ୍ଯ 

ଈର୍ଷାପଣ ଯାର ନିଶା ।।

ସମ୍ପର୍କର ମୂଲ୍ୟ ବୁଝିଥିଲେ ସିନା 

ବନ୍ଧୁତ୍ୱ ହୁଅଇ ଗଢା ।

ବନ୍ଧୁତ୍ୱ ଡୋରୀରେ ବନ୍ଧା ହେବା ପାଇଁ 

ବନ୍ଧୁ ସଭିଙ୍କର ଲୋଡା ।।