Library
Profile
ପ୍ରିୟାର ଓଢ଼ଣା
ପ୍ରିୟାର ଓଢ଼ଣା
ପ୍ରିୟାର ଓଢ଼ଣା ତଳେ ସଂସାରର
ସବୁ ସୁଖରାଶି ଠୁଳ
ନନ୍ଦନ ବନର ପୁଷ୍ପିତ କାନନ
ସଜ ପାରିଜାତ ଫୁଲ |
ବରୁଣ ଭୁବନ ଅମୂଲ୍ୟ ରତନ
ଅଳକାର ବଇଭଵ
ନିତ୍ୟ ବୃନ୍ଦାବନ ନିକୁଞ୍ଜ ସଦନ
ରାସରସ ସଉରଭ |
ଓଢଣାର ଘନ ବାରିଦ ଉହାଡ଼ୁ
ମୁଖଚନ୍ଦ୍ର ଵିଲୋକନ
କୋଟିଏ ଲାବଣ୍ୟ ନିଧି ଉତପନ୍ନ
ବିଜୟ ମୀନକେତନ |
ଚୂର୍ଣ୍ଣିଳ କୁନ୍ତଳ ଅଳକ ମଞ୍ଜୁଳ
ଖଞ୍ଜନ ଅଞ୍ଜନ ଆଖି
ଜବାଧରେ ଶୋଭା କୁନ୍ଦଦନ୍ତ ଲୋଭା
ମନ ରହିଯାଏ ଲାଖି |
ଓଢ଼ଣା ତଳର ଲାଜ ଲାଜ ହସ
ମରମକୁ ଛୁଇଁଯାଏ
ଚୁପି ଚୁପି କଥା ଅଭିମା
ନ ରୁଷା
ମାଦକତା ଭରିଥାଏ |
ଏ ଓଢ଼ଣୀ ମୋତେ ପାଗଳ କରଇ
ମୋ ସମ୍ପତ୍ତି ଜଗିଥାଏ
ରସିକ ନାଗର ଭୋକିଲା ନଜର
ପାଇଁକି ବାଧକ ହୁଏ |
ବେଦିରେ ୟା ଶୋଭା ନୈସର୍ଗିକ ପ୍ରଭା
ସପନର ଇନ୍ଦ୍ରଧନୁ
ବାସର ରାତିର ଏହାର ଅନ୍ତର
ପାଶୋର ନଯିବ ମନୁ |
ସେ ଓଢ଼ଣା ମୋର ସୁଖର ଦୁଃଖର
ପ୍ରୀତି ପ୍ରଣୟର ସାଥି
ସେ ଓଢ଼ଣା ସାଥେ ଖେଳିଛି ମୁଁ କେତେ
ବର୍ଣ୍ଣିଳ ବିଭୋର ରାତି |
ଆଜି ବୟଃ ଗତେ ତଥାପି ତା ମାଥେ
ସ୍ମୃତି କରେ ଜାଗରିତ
ଜଗତ ବନ୍ଦନ ଏ ନାରୀ ଭୂଷଣ
ଆଜି ନଗ୍ନ ବିଡ଼ମ୍ବିତ |
