ପ୍ରୀତି ମଦିରାର ନିଶା
ପ୍ରୀତି ମଦିରାର ନିଶା
ଝୁମିଗଲି ତୁମ ପ୍ରେମରେ ଲୋ ସଖୀ
ଝୁମିଗଲା ମୋ ଦୁନିଆ
ଗଢିଲି ଗୋଟିଏ ସପନର ଘର
ଛାତିରେ ଜାଳିଲି ନିଆଁ I
ତୁମେ ଗାଇଦେଲ ପ୍ରେମର ଗଜଲ
ରାତି ବୋଳିଦେଲା ରଙ୍ଗ
ସେଇ ରାତି ଆଜି ଧରି ବସିଛି ମୋ
ସପନ ନଉକା ମଙ୍ଗ I
ସପନ ରାଇଜେ ଘରଟିଏ କରି
ତା ସହିତ କରି ଭାବ
ସପନେ ବଞ୍ଚିବା ଶିଖି ଯାଇଛି ମୁଁ
ପାଇ ନାହିଁ ପରାଭବ I
ତୁମ ମୁହେଁ ଦେଖି ହସର ଲହରୀ
ହସେ ନିଦାଘର ଖରା
ତୁମ ଖୁସି ମୋତେ ଉପହାର ଦିଏ
ଅଗଣିତ ହୀରା ନୀଳା I
ଆଖି ଦରିଆରେ ସପନ ବୋଇତ
ଭାସୁଥାଏ ତୁମ ପାଇଁ
ତୁମେ ଚାହାଣୀରେ ଆର୍ଦ୍ର ହୁଏ ସଖୀ
ମୋ ଜୀବନ ମରୁଭୂଇଁ I
ତୁମରି ପ୍ରେମର ମଦିରା ପିଇ ଲୋ
ଘାରେ ଯେବେ ମୋତେ ନିଶା
ତୁମେ ଏକା ସଖୀ ପଢୁଥାଅ ବସି
ମୋ ଆଖି ତଳର ଭାଷା I