ପରିବେଶ ଓ ପରିସ୍ଥିତି

ମାନବ ଜୀବନ ଦି ଦିନର ଖେଳ

କେବେ ମିଳେ ସୁଖ ଶାନ୍ତି,

କେବେ ଥାଏ ଖାଲି ଦୁଃଖର ପସରା

ସବୁ ଲାଗେ ମିଥ୍ୟା ଭ୍ରାନ୍ତି ।

ବୀଜରୁ ଅଙ୍କୁର,ଅଙ୍କୁରରୁ ବୃକ୍ଷ

ହୁଏ ସୁସ୍ଥ ପରିବେଶେ,

ନୋହିଲେ ବୀଜଟି ଲଭଇ ମରଣ

ମାଟି ତଳେ ଅବଶେଷେ ।

ଟିକି ଝରଣାଟି କୁଳୁକୁଳୁ ଗାଇ

ଝରଇ ପର୍ବତ କୋଳୁ,

ସାଗର ସନ୍ଧାନ ଆଶା ଥାଏ ମନେ

ତା'ର ସୃଷ୍ଟି ହେବା ବେଳୁ ।

ପଥେ ଯଦି ପଡ଼େ ତୁଚ୍ଛା ମରୁଭୂମି

ହରାଇ ନିଜର ସତ୍ତା,

ମଲା ନଈ ସାଜି ଭାଗ୍ୟକୁ ଆଦରି

ଭୁଲେ ତା' ଅନନ୍ତ ଯାତ୍ରା ।

ଶିଶୁ ଟିଏ ଯଦି ପାଏ ପ୍ରୋତ୍ସାହନ

ବଢ଼ାଏ ଦେଶର ମାନ,

ଅନ୍ୟଥା ଝରେ ସେ ବଣମଲ୍ଲୀ ସମ

ଭାଙ୍ଗିଯାଏ ତା'ର ମନ ।

କବି ବା ଲେଖକ ଲେଖନୀ ମୁନରେ

ସୃଷ୍ଟ ସାହିତ୍ୟ କୋଣାର୍କ,

ଆଦୃତି ଅଭାବେ ଶୁଖେ ତା' ଲେଖନୀ

ପାଏ ସେ ମୃତ୍ୟୁର ଦୁଃଖ ।

ଜନ୍ମରୁ ମରଣ ଜୀବନର ପଥ

ଖାଲି ନୁହେଁ ସଂଖ୍ୟାଟିଏ,

ପରିସ୍ଥିତି ଯଦି ହୁଏ ଅନୁକୂଳ

ଜୟଟୀକା ଲଭିଥାଏ ।