ପ୍ରେମରେ କଳଙ୍କ

ପ୍ରେମରେ କଳଙ୍କ ପ୍ରଭୁ ନ ଲାଗୁ

        ଭକ୍ତି ଟି ସର୍ବଦା ତୋହର ଜାଗୁ

କରୁଣା କରହେ ତୁ ନିରାକାର

        ମନ ପ୍ରାଣେ ରହୁ ପ୍ରଭୁ ଆଦର

 ହେ ଜଗା ଠାକୁର

      ‌ପ୍ରେମରେ ନ ଦିଅ କଳଙ୍କ ମୋର !

ପ୍ରେମ ଶ୍ରଦ୍ଧା ପ୍ରୀତି ତୋର ଭକ୍ତିରେ

      ଆରାଧ୍ୟ ମୋହର ଭବ ସଂସାରେ

ଜାଳୁ ଥିବୁ ଦୀପ ତୋର ଛାମୁରେ 

    ପ୍ରେମର କଳଙ୍କ ନ ଲାଗୁ ମୋହରେ

ଏ ନର ଜନ୍ମରେ

      ସେବା କରୁ ଥିବି ଦାରୁବ୍ରହ୍ମ ରେ !

ମନୁଷ୍ୟ ଜୀବନ କର୍ତ୍ତବ୍ୟ ପାଇଁ 

     ନର ଏ ଜନମ ଭକ୍ତିର ପାଇଁ

ଧର୍ମ ସନାତନ ରକ୍ଷାର ପାଇଁ

    ସତ୍ୟନିଷ୍ଠ ଆଉ ତ୍ୟାଗର ପାଇଁ

ଅହିଂସାର ପାଇଁ

  ଜନତାଙ୍କର ସେବା କଲ୍ୟାଣ ପାଇଁ !

ପ୍ରେମ ରହୁ ମୋର ଦେବୁ ତୁ ଧ୍ୟାନ

    ଦୁର୍ଲ୍ଲଭ ଜୀବନେ କର୍ମର ଜ୍ଞାନ

ରହୁ ନିରନ୍ତରେ ତୋ ପଦେ ମନ

     ଜ୍ଞାନ ଓ ବିଜ୍ଞାନ ଦିଅହେ ଜ୍ଞାନ

ପ୍ରଭୁ ମଧୁସୂଦନ

    କଳଙ୍କିତ ନହୁ ପ୍ରେମ ସପନ !

ମୃତ୍ୟୁ କାଳେ ମୋର ନାମ ତୋ ଗୁଞ୍ଜୁ

   ମୋର ଅଙ୍ଗ ଅଙ୍ଗ ଭକ୍ତିରେ ରଞ୍ଜୁ

ନ ହେଉ ବିମୁଖ କର୍ତ୍ତବ୍ୟ ବାଟୁ

   ସେବାରେ ତୋହର ଜୀବନ କଟୁ

ଜୀବ ହିଂସା ନହୁ

   ପ୍ରେମ ଏ ସାଗର ଭକ୍ତିରେ ବହୁ !