ପ୍ରେମର ପରିଧି

ପ୍ରେମ ଏଠି ମରୀଚିକା

ତଥାପି ପ୍ରେମୀ ଯୁଗଳଙ୍କ

ଭିଡ଼ ଏଠି

ବିଚରା ମରୁଭୂମିର

ନିର୍ବୋଧ ଓଟ ଟିଏ ପରି

କଣ୍ଟାଗଛ ଖାଉ ଖାଉ

ଓଠରୁ ଝରୁଥିବା

ନିଜ ରକ୍ତ ନିଜେ ପିଉ ଥାଏ।

ପ୍ରେମ ଏଠି ଦୂର ଦିଗବଳୟ

ଯେଉଁଠି ଆକାଶ ମାଟିକୁ

ଆଲିଙ୍ଗନ କରିବାର

ଭ୍ରମ ସୃଷ୍ଟି କରୁଥାଏ

ତଥାପି ବିରହ ବେଦନାରେ

ପ୍ରେମିଟିଏ ନିଇତି ଝୁରି ମରୁଥାଏ।

ପ୍ରେମ ଏଠି ଦୂର ପାହାଡ଼ଟିଏ

କିନ୍ତୁ ନିକଟକୁ ଗଲେ

ଦୃଷ୍ଟି ଗୋଚର ହୁଏ

ଦୁର୍ଗମ ପଥ ଟିଏ

ହାରି ଯାଆନ୍ତି ପ୍ରେମୀ ଯୁଗଳ ଏଠି

କେବେ କେହି କାହାର ହାତ ଛାଡି ଥାଏ

କେବେ ପୁଣି ଏ ସବୁର ଅନ୍ତ ଘଟିଥାଏ

ପ୍ରେମ ଏଠି ମନର ମିଳନ ନୁହେଁ

ଦେହର ମିଳନ

ପ୍ରେମ ଏଠି ଯୌବନର କ୍ଷୁଧା

ପ୍ରେମ ଏଠି ଶରୀରର 

କ୍ଷଣିକ ଉତ୍ତେଜନା

ଯାହାର ବଶବର୍ତ୍ତୀ ହୋଇ

ଅନେକ ପ୍ରେମୀ ଯୁଗଳ ଏଠି

ନିଅନ୍ତି ସଲିଳ ସମାଧି

ଏ ହେଉଛି ପ୍ରେମର ପରିଧି।