ପ୍ରେମର ଦ୍ରୁମ

ପ୍ରୀତି ଫଗୁଣରେ ମନ ଅଗଣାରେ 

ଫୁଟିଛି ପ୍ରେମର ଫୁଲ 

ଆଦରେ ଯତନେ ବଢ଼ାଇଛି ବୋଲି 

ଦେଇଛି ଅମାପ ମୂଲ |

ଦାରୁଣ ବୈଶାଖ ମୁଷଳ ଆଷାଢ଼ 

କେବେ ଅବା ଶୀତ ଲହରୀ 

ସବୁ ଶତ୍ରୁ ଠାରୁ ରଖିଛି ମୁଁ ତାକୁ 

ହୋଇଣ ଜାଗ୍ରତ ପ୍ରହରୀ |

ସେନେହ ଶରଧା ପେରମ କବିତା 

ପାଇ ଛୋଟ ବୀଜ ଆଜି 

ବୃହତ ବୃକ୍ଷରେ ପରିଣତ ହେଲା 

ସୂର୍ଯ୍ୟ ଚନ୍ଦ୍ର ହେଲେ ସାକ୍ଷୀ |

ରହିଛି ରହିବି ତୋହରି ପାଇଁ ଲୋ 

ପ୍ରିୟା ମୋ ଅଳକାନନ୍ଦା 

ଏମିତି ବଢିବ ଆମ ପ୍ରେମ ଦ୍ରୁମ 

ସାତ ସୁରେ ହୋଇ ବନ୍ଧା |

ଗଛ ନୁହେଁ ଏହା ଆମ ପ୍ରେମ ଛବି 

ସଙ୍କେତ ଭାବନା ମୋର 

ନିତି ଦେଖୁଥିବି ତୋର ପ୍ରତିଛବି 

କେବେ ତୁ ହେବୁନି ଦୂର |