ପ୍ରେମୋଦୟ ଚମ୍ପୂ - ୧୦
ପ୍ରେମୋଦୟ ଚମ୍ପୂ - ୧୦
ପ୍ରେମୋଦୟ ଚମ୍ପୂ
କବି ସୂର୍ଯ୍ୟ ବଳଦେବ ରଥ
(ଚୌପଦୀ ପ୍ରେମୋଦୟ )
(୧୦)
ସଖୀ
ରାଗ - ପୁନ୍ନାଗ - ଯତି
ଆସ ଆସ ସଖ, ଯିବା ବାସକୁ ଗୋ (ଘୋଷା)
ଆଉ ରହିଲେ ଏ ବନେ - ଅସତୀ ବୋଲିଟି ଜନେ
ଅବଶ୍ୟ କରିବେ ଉପହାସକୁ ଗୋ (1)
ଅଖିଳ ଲାବନ୍ୟଶୀରି - ଆଉ କି ଆସିବେ ହରି
ଅରୁଣ ଭଜିଲା ପରକାଶକୁ ଗୋ (2)
ଆମ୍ଭ ଅବସ୍ଥା ସଜନୀ - ଆଗରେ ରଖି ପଦ୍ମିନୀ
ଅଧରେ ଧରିଛି ଦରହାସକୁ ଗୋ (3)
ଆନ ନାଗରୀକୁ ଧରି - ଆରମ୍ଭିଲେ ନିଶ୍ଚେ ହରି
ଅନଙ୍ଗ ରଙ୍ଗରେ ଅଭିଳାସକୁ ଗୋ (4)
ଆର୍ତ୍ତି କରେ ଜଗଦେବ - ଆଉ କି ସତେ ଆସିବ
ଅଭିନବ କୁଞ୍ଜବନ ରାସକୁ ଗୋ (5)