ପ୍ରେମ

ସ୍ମୃତିରୁ ଆରମ୍ଭ,    ହୃଦୟ ମଧ୍ୟରେ,

     ସ୍ପନ୍ଦନ ସାଥେ ଜଡିତ

ପ୍ରତି ସ୍ପନ୍ଦନରେ,   ସାଥେ ସ୍ଥିତ ରହି,

     ଉତ୍ସାହିତ ଆଲୋଡିତ ।

ପ୍ରାଣ ହର୍ଷ ଶ୍ରାବ୍ୟ,   କୀର୍ତ୍ତି ମୂର୍ତ୍ତି ସ୍ତବ,

     ଢାଳେ ଭାଙ୍ଗୁର ମୂର୍ଚ୍ଚନା

ଆକର୍ଷିତ ମନ,      ଯୁଗଳ ଚୁମ୍ବକ,

     ନିରନ୍ତର ୟେ କାମନା ।

ମାତୃ ପିତୃ ପ୍ରେମ,    ଅସୀମ ମହକ,

    ଚିର ନିତ୍ୟ ଓ ଶାଶ୍ୱତ

ଭାତୃ ଭଗ୍ନୀ ପ୍ରେମ,ସ୍ନେହ ଶ୍ରଦ୍ଧା ସଂଗେ,

    ଆଜୀବନ ଆଲୋଡ଼ିତ ।

ଗୁରୁ ଶିଷ୍ୟ ପ୍ରେମ,  ଭକ୍ତି ମୁକ୍ତି ସାଥେ,

    ଉଦୟ ଜ୍ଞାନର ଜ୍ୟୋତି

ବାଲ୍ୟ ବନ୍ଧୁ ସଦା,   ପଥ ପ୍ରଦର୍ଶକ,

   ଥାଏ ହୋଇ ନିଜ ଶକ୍ତି ।

ଯୁଗ ଯୁଗ ପାଇଁ,  ପତିପତ୍ନୀ ପ୍ରେମ,

   ବନ୍ଧା ଜୀବନର ପଥେ

ଜୀବନ ମରଣ,    ଏକ ସାଥେ ରହି,

   ଚାଲେ ସୁଖ ଦୁଃଖ ରଥେ ।

ପ୍ରେମ ଚିରନ୍ତନ,   ପ୍ରେମ ହିଁ ସମ୍ପର୍କ,

    ପ୍ରେମ ବିନା ନାହିଁ ଶାନ୍ତି

ଏହି ପ୍ରେମ ବନ୍ଧେ,  ସୂର୍ଯ୍ୟ ଚନ୍ଦ୍ର ପୃଥୀ,

    ନିଜ ପଥେ ରହିଛନ୍ତି ।

ପ୍ରେମ ଅର୍ଥ ନୁହେଁ,  ଛଳନା ଲାଞ୍ଛନା,

    ନୁହେଁ ଭଣ୍ଡ ପ୍ରତାରଣା

ପ୍ରେମ ଶବ୍ଦ ସାଥେ,  ନଲାଗୁ କଳଙ୍କ,

    ପ୍ରେମ ସୃଷ୍ଟି ସଂରଚଣା ।

ଗୋପୀବିନ୍ଧା, ବ୍ରହ୍ମଣ ଗାଁ,

ବାଲେଶ୍ୱର(ଭଦ୍ରକ)