ଆସୁଛି ଯେ ନବବର୍ଷ
ଆସୁଛି ଯେ ନବବର୍ଷ
ଚକ୍ଷୁ କର୍ଣ୍ଣ ସ୍ଫୁରେ ସ୍ପନ୍ଦନ ହୃଦୟେ
ଆଗନ୍ତୁକ ନବବର୍ଷ ।
ଜାଗରିତ ମନ ଉଲ୍ଲାସ ସମୀର
ଶରୀରେ ଅଲୋଡ଼ା ହର୍ଷ ।।
ଶିକ୍ଷା ଦୀକ୍ଷା କର୍ମବର୍ଦ୍ଧିଷ୍ଣୁ କାମନା
ସବୁରି ହୃଦୟେ ନେଇ ।
ଆଗମନ ହୁଅ ନବ ବର୍ଷ ତୁମେ
ଶାନ୍ତ ସୁସ୍ଥ ତୃପ୍ତ ହୋଇ ।।
ହିଂସା ଦ୍ଵେଷ ଘୃଣା ଦୂରୀଭୂତ ହେଉ
ଆଧୁନିକ ସମାଜରୁ ।
ସମାନତା ସାଥେ ବଞ୍ଚନ୍ତୁ ମନୁଷ୍ୟ
ଦୟାମୟଙ୍କ କୃପାରୁ ।
ଦୂରୀଭୂତ ହେଉ କରୋନାର କାୟା
ସୁସ୍ଥ ହେଉ ୟେ ସମାଜ ।
ଦୁଇ ହଜାର ଓ ଏକୋଇଶ ବର୍ଷ
ବୁଣିଦେଉ ହର୍ଷ ବୀଜ ।।
ଅଧର୍ମକୁ ତ୍ୟାଗୀ ଧର୍ମକୁ ଆଦରି
ବଞ୍ଚି ବଞ୍ଚାଉ ମାନବ ।
ମାନବ କଲ୍ୟାଣେ ରହୁ ଜନ ନେତା
ନ ରହୁ ହିଂସା ତାଣ୍ଡବ ।।
ଗୁରୁ ଗୁରୁଜନ ବୃଦ୍ଧ ପିତା ମାତା
ନ ହୁଅନ୍ତୁ ନିଃସହାୟ ।
ବଳି ନ ପଡନ୍ତୁ ପରି ଭଳି କନ୍ୟା
ଠାକୁରେ ମୋ ଅଭିପ୍ରାୟ ।।
ଲାଞ୍ଚ ଭ୍ରଷ୍ଟାଚାର ସାଥେ ବ୍ୟଭିଚାର
ଦୂର ହେଉ ଯେ ସଂସାରୁ ।
ସୁସ୍ଥ ଜୀବନର କାମନା ମୋହର
ନବବର୍ଷର ଆଗରୁ ।।
ବୁଢା ମହାଦେବ ଦିଅ ହେ ଆଶିଷ
ପ୍ରଦୂଷଣ ମୁକ୍ତ ବିଶ୍ୱ ।
ନୋହିଲେ ଠାକୁରେ ଶ୍ୟାମଳ ଧରିତ୍ରୀ
ହୋଇ ଯାଇଥିବ ନିଶ୍ୱ ।।
ବିଶ୍ୱକଲ୍ୟାଣରେ ରହୁ ନବ ବର୍ଷ
ଶୃଙ୍ଖଳାରେ ଯାଉ ଦିନ ।
ପଡୋଶୀ ଦେଶର ଭୟ ଦୂର ହେଉ
ଜୟ ଜବାନ କିଷାନ ।।