Library
Profile
ପ୍ରେମ
ପ୍ରେମ
ପ୍ରେମ ନିର୍ବିଷୟ ପ୍ରେମର ସମ୍ପର୍କ
ସଦା ରହେ ନିର୍ବିକାର ।
ସକାମ ନିଷ୍କାମ ହୋଇଥାଏ ପ୍ରେମ
ସୁଧୀଏ କର ବିଚାର ।୧।
ପ୍ରାକୃତ ବା ଅପ୍ରାକୃତ ଏ ଭେଦରେ
ବିଭାଜନ ହୁଏ ପ୍ରେମ ।
ନିଷ୍କଳଙ୍କ ସିନା ପ୍ରେମ ପରିଭାଷା
ରାଧାକୃଷ୍ଣଙ୍କର ପ୍ରେମ ।୨।
ପ୍ରେମର ବିଷୟ ଅସରନ୍ତି ମାତ୍ର
କେବଳ ଈଶ୍ବର ପ୍ରେମ ।
ହୋଇଲେ ଜାଣିବ ବାସ୍ତବ କଥା ଏ
ପୂର୍ଣ୍ଣ ହେବ ମନସ୍କାମ ।୩।
ଈଶ୍ବର ପ୍ରେମରେ ସବୁ ଭୁଲେ ନର
ନରହଇ ବାହ୍ଯ ଜ୍ଞାନ ।
ଆଦର ନରହେ ଜଗତ ବସ୍ତୁରେ
ଈଶ୍ବର ପ୍ରେମେ ମଗନ । ୪।
ପ୍ରଭୁ ପ୍ରେମୀ ନିଜ ଶରୀର ଭୁଲଇ
ପ୍ରେମ ବିନା ଶ୍ରୁତି ଜ୍ଞାନ ।
ନିଷ୍ଫଳ ହୁଅଇ ସବୁ ସ୍ମୃତି ପୂଜା
ଧ୍ୟାନ ଶ୍ରବଣ କୀର୍ତ୍ତନ ।୫।
ପ୍ରେମ ପ୍ରେମୀ ପ୍ରେମାସ୍ପଦ ହୁଏ ଏକ
ଧନ୍ୟ ଏ ଅନନ୍ୟ ପ୍ରେମ ।
ପ୍ରଭୁ ପ୍ରେମ ବିନା ନିଷ୍ଫଳ ଜୀବନ
ବୃଥା ହୁଏ ସବୁ ଶ୍ରମ ।୬।
ପୂଣ୍ୟଶ୍ଳୋକ ପ୍ରହଲ୍ଲାଦ ପରାଶର
ଅମ୍ବରୀଷ ପୁଣ୍ଡରୀକ ।
ନାରଦ ବ୍ୟାସ ବଶିଷ୍ଠ ବିଶ୍ଵାମିତ୍ର
ଦାଲଭ୍ୟ ଶୁକ ଶୌନକ ।୭।
ଭୀଷ୍ମ ରୁକ୍ମାଙ୍ଗଦ ବିଭୀଷଣାର୍ଜୁନ
ପ୍ରଭୁ ପ୍ରେମେ ହେଲେ ବାଇ ।
ଅହଲ୍ୟା ଦ୍ରୌପଦୀ କୁନ୍ତୀ ମନ୍ଦୋଦରୀ
ତାରା ରାଧା ମୀରାବାଈ ।୮।
ନବଧା ଭକତି ପ୍ରେମରସ ସାର
ସୁନ୍ଦର ଏ ପ୍ରେମ ଭାବ ।
ଯେଉଁ ଭାବରେ ଭାବିତ ହେବ ପ୍ରେମେ
ସେ ଭାବେ ମୁକତି ହେବ ।୯।
ବହୁ ଜନ୍ମ ପରେ ଜ୍ଞାନୀ ପ୍ରେମେ ମଜ୍ଜି
ବାସୁଦେବଙ୍କୁ ଲଭଇ ।
ବାସୁଦେବ ବିନା ଆନ କିଛି ନାହିଁ
ପ୍ରେମର ସ୍ବରୂପ ଏହି ।୧୦।
