ପ୍ରେମ ଉପହାର

ତୁମପାଇଁ ସଖି ଜହ୍ନ ରାଇଜକୁ 

  ଯାଇଥିଲି ଦିନେ ମୁହିଁ 

ଜହ୍ନକୁ ଆଣି ମୁଁ ତୁମକୁ ପ୍ରିୟା ଗୋ 

  ଉପହାର ଦେବା ପାଇଁ ।।

ତୁମ ନାମ ଶୁଣି ଚନ୍ଦ୍ରମା ହସିଲେ 

  ଦେଲେ ନି ମୋତେ ହେ ଧରା 

କହିଲେ ସେ ମୋତେ ତୋ ପ୍ରିୟାର ମୁଖଟି 

  ମୋ ଠାରୁ ସୁନ୍ଦର ପରା।। 

ସେଠାରୁ ଆସିଲି ତାରା ଗଣ ପାଶେ ,

   ଅଟକି ଯେବେ ମୁଁ ଗଲି 

କିଛି ନ କହୁଣୁ ଆଗୁଆ କହିଲେ 

  ଆମେ ନୁହଁ ଯୋଗ୍ୟ ବୋଲି ।।

ଉପବନେ ଗଲି କୁସୁମ ପାଖକୁ 

   ଫୁଲ ଟିଏ ପାଇଁ ମୁହିଁ ।

ଗଛ ଡାଳେ ଥାଇ କୁସୁମ ହସିଲା 

  ମୋ ପାଖେ ଆସିଲା ନାହିଁ ।। 

କହୁଥିଲା ସିଏ ତୁମରି ମହକ 

   ତା' ଠାରୁ ଅଧିକ ବୋଲି 

ମହୁ ଠାରୁ ବେଶି ମଧୁର ଲାଗିବ 

   ହସିଦେଲେ ତୁମେ ଖାଲି ।।

ଶେଷରେ ଆସିଲି ଶୂନ୍ୟ ହସ୍ତରେ 

   ହୃଦୟେ ପ୍ରେମକୁ ନେଇ 

ସେ ପ୍ରେମ ଟିକକ ତୁମକୁ ପ୍ରିୟା ଗୋ 

  ଉପହାର ଦେବା ପାଇଁ ।।