ପ୍ରେମ ବନ୍ଧନ
ପ୍ରେମ ବନ୍ଧନ
ପହିଲି ପ୍ରେମର
ପଥ ତ ଖସରା
ପଛକୁ ଫେରିବା କଷ୍ଟ ,
ପରକୀୟା ପ୍ରେମ
ପରମାଣୁ ବୋମା
ପରିଣାମେ ପ୍ରାଣ ନଷ୍ଟ ।
ପାକୁଆ ପାଟି କୁ
ପାଚିଲା ପଣସ
ପାଗ ଭିଡ଼ୁ ଥାଏ ରଜ ,
ପାକଳ ବୟସ
ପାଣିଚିଆ ଲାଗେ
ପାଖେଇ ଆସିଲେ ସଂଜ ।
ପିଆସୀ ରାଧିକା
ପିଇଯାନ୍ତି ଏକା
ପିଆଲାରେ କୃଷ୍ଣ ପ୍ରେମ ,
ପିଶାଚୀ ସଖିଙ୍କୁ
ପିତା ପିତା ଲାଗେ
ପିତା ଶୁଖୁଆ ରେ ନିମ ।
ପୀୟୂଷ ପୀୟୂଷ
ପୀତବାସ ହସ
ପୀରତି ମଦିରା ସମ ,
ପୀନ ସ୍ତନୀ ରାଈ
ପୀଠ ଖୋଜୁ ଥାଇ
ପୀଡ଼ାରୁ ହେବେ ଉପଶମ ।
ପୁନେଁଇ ର ଚାନ୍ଦ
ପୁରୁଣା ଦିଶୁଛି
ପୁଣି ଦେଖେ ଯେବେ ତମ ମୁହଁ ,
ପୁରାତନ ପ୍ରେମ
ପୁଞ୍ଜେ କୋହ ଧରି
ପୁଣି ଝରି ଯାଏ ହେଇ ଲୁହ ।
ପୂତନାରି ସ୍ବନ
ପୂବେଇ ପବନ
ପୂରାଏ ରାଧିକା କାନେ ,
ପୂର୍ବ ଦ୍ବାର ଜଗେ
ପୂତନା ନଣନ୍ଦ
ପୂତା ରାଈ କାନ୍ଦେ ମନେ ।
ପୃଥ୍ବୀ ଘୂରେ ବୋଲି
ପୃଥା ପୁତୁରା ର
ପୃଥକ ପୃଥକ ମନ ,
ପୃଥୁ ନିତମ୍ବିନୀ
ପୃଚ୍ଛନ୍ତେ ରାଈଙ୍କୁ
ପୃଥକ ଲାଗେ କି ପ୍ରେମ ?
ପେଶଳ କହ୍ନେଇ
ପେଶିଲା କି ବାଣ
ପେରମେ ଘାଇଲା ରାଈ ,
ପେତୁଣୀ ନଣନ୍ଦ
ପେଞ୍ଚମାରି କହେ
ପେଟେ ଦାନା ଯାଉ ନାହିଁ ।
ପୋଖରୀ ପାଣିରେ
ପୋକ ସାଲୁବାଲୁ
ପୋଡ଼ା ମୁହୀଁ ଚାଲ ଯିବା ଯମୁନା ,
ପୋଡ଼ି ଗଲେ ଯାଉ
ପୋଡ଼ା ସଂସାର ମୋ'
ପୋଛି ପାରୁ ନାହିଁ ମନରୁ କାହ୍ନା ।
ପୌରୁଷ ଦେଖିଛି
ପୌରବୀ ପତିର
ପୌଷ ପୂର୍ଣ୍ଣିମା ଦିନ ,
ପୌର୍ଣ୍ଣିମ ଯାହାଙ୍କୁ
ପୌଚ ଭାବେ ତାରେ
ପୌଗଣ୍ଡ ରେ ଦେଲି ମନ ।