ପ୍ରେମ ପରିଭାଷା
ପ୍ରେମ ପରିଭାଷା
ପ୍ରେମ ପରିଭାଷା
ସମସ୍ତଙ୍କୁ ଜଣା ନାହିଁ ,
ପ୍ରେମ ତ ଅନନ୍ୟା !
ଖୋଜିଲେ ବି ମିଳେ ନାହିଁ !!
କାହିଁକି ଭାବୁଛ
ପ୍ରେମ ବନ୍ଧ୍ୟା, କଳଙ୍କିତା ?
ପ୍ରେମ ଯେ ଦୁହିତା ,
ଦୁଇ କୁଳ ପାଇଁ ହିତା....!!
ଗୋଟିଏ କୁଳରେ
ପ୍ରେମ ହୁଏ ଅଙ୍କୁରିତ ,
ଅଙ୍କୁର ତାହାର
ପୁଷ୍ପ ବାସେ ପରିଣୀତ !
ଅନ୍ୟ କୁଳେ ପ୍ରେମ
ପରିଣତ ବୟସରେ ,
ତା' ସୁବାସେ ଛୁଟେ
ମଧୁମୟ ଇଲାକାରେ !!
ପ୍ରେମର ପରିଧି
ଛୁଇଁଥାଏ ଦିଗ୍ବଳୟ ,
କେତେବେଳେ ପ୍ରଜ୍ଞା
କେବେ ପୁଣି ସେ ସଂଶୟ !
କେବେ ସେ ଗୋଲାପି
ଗୋଲାପ ମୃଦୁ ମହକ ,
କେବେ ପୁଣି ତା'ର
କାମନାର ଅଙ୍କ ନର୍କ !!
ପ୍ରେମ ତ ଅନିନ୍ଦ୍ୟ ,
ଦିବ୍ୟ ଚେତନାର ରୂପ ,
ନବପରିଣୀତା ,
ପୁଣି କେବେ ସେ ବିଦ୍ରୂପ !
କେତେବେଳେ ଦିଏ
ମିଳନମଧୁର ରାତି ,
ବିରହ-ବନ୍ୟାରେ
କେବେ ଜଳେ ହୋଇ ପ୍ରୀତି !!
ମିଳନ ବିଚ୍ଛେଦ
ପ୍ରେମର ଦୁଇ ପାଖୁଡ଼ା ,
ବୃନ୍ତଟି ତାହାର
ସବୁଜ ରଙ୍ଗରେ ଗଢ଼ା !
କାହିଁକି କରୁଛ
ପ୍ରେମରଙ୍ଗକୁ ରକ୍ତାକ୍ତ ?
ପ୍ରେମ ତ ସୁନ୍ଦର
କରନି ତା'କୁ କ୍ଷତାକ୍ତ !!