ପ୍ରେମ ଭିକ୍ଷା
ପ୍ରେମ ଭିକ୍ଷା
ସ୍ୱପ୍ନିଳ ଆଖିରେ ଆଙ୍କେ
ତୁମ ପାଇଁ ହଜାରେ ସମ୍ଭାବନା,
ଶୂନ୍ୟ କାନଭସରେ ଆଙ୍କେ
ଭବିଷ୍ୟତର ମୁହୂର୍ତ୍ତକୁ,
ପୂର୍ଣ୍ଣ ହେଉ ବା ନ ହେଉ
ଦେଖିବାକୁ ଭଲ ପାଏ ଏ ଖିଆଲି ମନ ।
ଆଞ୍ଜୁଳାଏ ପ୍ରେମର ପ୍ରତିଦାନେ
ଦେଇପାରେ ସବୁକିଛି,
ହରାଇପାରେ ଜୀବନର
ତମାମ ପ୍ରେମପୁଞ୍ଜି,
ଅସ୍ତିତ୍ୱକୁ ବି ହଜାଇପାରେ
ବିନାକିଛି ପ୍ରଶ୍ନବାଚୀରେ ।
ତୁମେ କି ବୁଝିନପାର
ମୋ ଉଦାସ ଆଖିର ପରିଭାଷା,
ଆନ୍ଦୋଳିତ ହୃଦୟର କମ୍ପନ,
ତୁନି ଓଠ ବି କରିପାରେ
ପ୍ରେମ ଭିକ୍ଷା ।
ଅହରହ ଜଳେ ମୁଁ
ତୁମ ପ୍ରେମର ସାନିଧ୍ୟ ପାଇଁ,
ପ୍ରେମର ଶିଉଳି ଲତାରେ
ଇଚ୍ଛା ପାଦ ଖସାଇବା ପାଇଁ,
ସାଜି ତୁମ ପ୍ରେମ ପୂଜାରିଣୀ
କରେ ଆଜି ପ୍ରେମ ଭିକ୍ଷା ।
ଘାସ ଗାଲିଚା ଉପରେ
ଶୀତୁଆ ସକାଳର କାକର ଟୋପା ପରି,
ବିନ୍ଦୁଏ ପ୍ରେମ ସମର୍ପି
ସମ୍ପୂର୍ଣ୍ଣ କରିଦିଅ ମତେ ।
ନା ଆକାଶର ବାଦଲ ପରି
ଚିତ୍କାର କରିପାରିବି,
ନା ବସୁଧା ପରି ଫାଟିଯାଇପାରିବି
ପାରିବ ତ ଚେଷ୍ଟା କର
ବୁଝିବାକୁ ମୋର ନୀରବତାର ସ୍ଵରକୁ ।
ଏ ଜୀବନର ଶେଷତ୍ତମ ପାହାଚରେ ମଧ୍ୟ
ଥିବି ତୁମ ପ୍ରେମର ଅପେକ୍ଷାରେ,
ମୁଁ ପାଷାଣି ଅହଲ୍ୟା
ଲଭିବି ନାରୀତ୍ବ ତୁମ ପ୍ରେମର ସ୍ପର୍ଶରେ ।