ପର୍ଦ୍ଦା ପଛରେ କାହାଣୀ

ଲକ୍ ଡାଉନ ରେ ଦେଶ ପଡିଛି

ସାରା ବିଶ୍ବ ହୁଲସ୍ଥୁଲ ହେଉଛି।

ମହାଭାରତର ଅଠର ଦିନ

ଏକୋଇଶ ଦିନ ଲକଡାଉନ ।

ପୋଲିସ୍ ସହିତ ମୁନ୍ସିପାଲଟି 

ଘରେ ପହଞ୍ଚାନ୍ତି ପରିବା ପାତି।

ଅତ୍ୟାବଶ୍ୟକିୟ ସେବା ସୁଲଭ

ସାମାଜିକ ଦୂରତା ହେଲା ଶୁଭ। 

ଖଟିଖିଆ ଯେତେ ଦିନ ମଜୁରି

ବୁଲା ବିକାଳି ଠୁ ଛୋଟ ବେପାରୀ ।

ଷ୍ରିଟ୍ ଫୁଡ୍ ବାଲା ମିସ୍ତ୍ରୀ ଯେତେକ

ନିୟମ ମାନନ୍ତି ପେଟରେ ଭୋକ ।

କେତେ ଭୋଗୁଛନ୍ତି ଦାଉ ତାହାର

ସରକାର ପାଖେ ନାହିଁ ଖବର ।

ସାମ୍ବାଦିକ ଖାଲି ରାସ୍ତାରେ ବୁଲେ

ସେନସନି ଖବର ଯେଉଁଠି ମିଳେ ।

କିଏ ସେ ଛକରେ ଖାଇଲା ଲାଠି

କ୍ୟାମେରା ପକାଏ ଫାଟିଛି ପିଠି ।

ଥିଲା ବାଲା ସିନା ବସି ଖାଇବେ

ଅଣସର ଦୁଃଖ ଆଦରି ନେବେ ।

ଦିନ ସରି ଯିବ ଚିହ୍ନ ରହିବ

ଦୁଃଖୀ ରଂକିଙ୍କର ମନେ ପଡିବ ।

ଅପ୍ରେଲ ଚଉଦ କେବେ ଆସିବ

ଏ କଳା ବାଦଲ କେବେ ହଟିବ !

ବନ୍ଦ ଘରେ ଗଢା ଜଗତ ନାଥ

ଦ୍ୱାର ଖୋଲିବାରୁ ଅପାଦହାତ ।

ବନ୍ଦୀ ଶାଳେ କୃଷ୍ଣ ହେଲେ ଜନମ

ବନ୍ଦ ଘର ମଣ ବୈକୁଣ୍ଠ ଧାମ ।

ଖୋଲିଲେ ଦୁଆର ସରବ ନାଶ

ନଭୁଲିବ ମନୁ ଦନେଇ ଦାସ ।