ପରବଟି ମନଲାଖି

ଆସିଯାଏ ଯେବେ ରଜ ,

ତୋଟାମାଳେ ଦୋଳି ହୁଏଟି ସଜ ଲୋ

କରୁ ଯେ ଭାରି ମଉଜ

ରଜ ସଜବାଜ ହୋଇ ,

ବୁଲୁଥାଉ ପାଦେ ଅଳତା ନାଇ ଲୋ

କଦଳୀ ପାଟୁକା ଦେଇ

ଖାଇ ଆମେ ପୋଡ଼ପିଠା ,

ଦୋଳି ଝୁଲିବାକୁ ଯାଉଟି ତୋଟା ଲୋ

ରଜ ପାନ ଭାରି ମିଠା

ଗାଇ ରଜ ଦୋଳି ଗୀତ ,

ଝୁଲୁ ଯେ ବଉଳ ,ସଙ୍ଗାତ ,ମିତ ଲୋ

ହରଷ କରିଣ ଚିତ୍ତ

ଗାଆଁର ଯୁବକ ଦଳ ,

ଖେଳନ୍ତି କବାଡ଼ି ,ତାଆସ ଖେଳ ଲୋ

ହସି କଟିଯାଏ ବେଳ

ବରଷକେ ଆସେ ପର୍ବ ,

ଆମ ରାଇଜର ଅଟେ ଏ ଗର୍ବ ଲୋ

ନାଶେ ଭେଦା ଭେଦ ସର୍ବ

ଗ୍ରାମବାସୀଙ୍କ ଠୁଁ ଦେଖି ,

ସହରର ଲୋକ ଗଲେଣି ଶିଖି ଲୋ

ପରବଟି ମନଲାଖି