ପୋଷାଶୁଆ
ପୋଷାଶୁଆ
ମୁଁ ଗୋଟିଏ ପୋଷାଶୁଆ,
ଇଚ୍ଛା ନଥିଲେ ବି ମୋର
ବୋଲେ ରାମନାମ ।
ସମସ୍ତେ ବୋଲନ୍ତି ଯେଣୁ
ମୋତେ ତେଣୁ ବୋଲିବାକୁ ହେବ,
ନ ବୋଲିଲେ
ମୁଁ କୁଆଡେ ସଂଘଛଡା ହେବି,
ଲଣ୍ଡା ହୋଇ ପୁରୀ ଯିବି,
ଗୋବର ପାଣି ପିଇବି ।
ପହଁରିବା ସତେ ଭାରି କଷ୍ଟ
ସୁଅର ଏ ବିପରୀତ ଦିଗେ!
ତେବେ କଣ ସେଥିପାଇଁ
ପହଁରାଳି ଡରିଯିବ?
ସୁଅ ବିପରୀତ ଦିଗେ
ନ ପହଁରେ ଯେବେ
ତାହେଲେ ସେ କିବା ପହଁରାଳି?
ସ୍ରୋତ ଅନୁକୂଳ ଦିଗେ
ଭାସିବାରେ କିବା ବାହାଦୂରି?
ପହଁରିବାର 'ନିଜତ୍ବ' ଭାସିବାରେ କାହିଁ?
ମଲାଲୋକ ଭାସିଯାଏ
କାଠଗଡ ଭଳି
ଚୁପ୍ ଚାପ ଗୋଡଯାକି
ସୁଅକଥା ମାନି ।
ସମସ୍ତେ କହିଲେ ବୋଲି
ମୁଁ କଣ ଶବଟିଏ ହେବି?
ମୁଁ କଣ ଜୟଧ୍ଵନି ଦେବି?
ସ୍ରୋତ ଅନୁକୂଳ ଦିଗେ
ଭାସିଯିବି କାଠଗଡ ହୋଇ?
ସାଜିବି ପଛେ ନାସ୍ତିକ
ପିଇବି ଗୋବରପାଣି
ତଥାପି ମୁଁ ବଞ୍ଚିଥାଇ ମରିପାରିବିନି,
ପହଁରିବି ଗୋଡହାତ ବାଡେଇଣ
ସୁଅର ଏ ବିପରୀତ ଦିଗେ ।
ଅନୁଭବ କରିବି ମୁଁ
ଗୋବରପାଣିର ସ୍ଵାଦ,
ନାସ୍ତିକ ହେବାର ଏକ ନୂଆ ଅନୁଭୂତି ।