ପଣା ସଂକ୍ରାନ୍ତି

ଚଉଁରା ଉପରେ ବସୁନ୍ଧରା ଠେକି

ବାନ୍ଧିବା ଆସ ହେ ମିତ,

ବେଲ ପଣା ପିଇ ଗୀତ ଗାଇ ଗାଇ

ଦେଖିଯିବା ଝାମୁ ଯାତ ।

ଘଣ୍ଟ ପାଟୁଆଙ୍କୁ ଜୁହାର ହୋଇବା

ସାରଳା ନାଆଁକୁ ଧରି,

ନୂଆଁ ବରଷକୁ ସ୍ବାଗତ କରିବା

ଆନନ୍ଦ ମଉଜ କରି ।

ଆସିଅଛି ପରା ପ୍ରଥମ ସଂକ୍ରାନ୍ତି

ଗ୍ରୀଷମ ଋତୁକୁ ନେଇ,

ସୂର୍ଯ୍ୟଦେବ ତାପ ବଢାଇବେ ଆଜି

ବିଷୁବ ରେଖାରେ ରହି ।

ଜଗାକୁ ସୁମରି ନୂଆଁ ପାଞ୍ଜି ପୁଣି 

ହୋଇବ ଯେ ପ୍ରଚଳନ,

ନୂଆଁ ବରଷର ଶୁଭ ମନାସିବ

ପ୍ରତିଟି ଓଡ଼ିଆ ପ୍ରାଣ ।

ଅଗ୍ନି ଆଉ ବାୟୁ ବେଗ ବଢିଯିବ

ଅସମ୍ଭାଳ ହେବ ଦିନ,

ଦେବତା କୋପରୁ ମୁକତି ଦେବାକୁ

ଜନମିବେ ହନୁମାନ ।

ସାହି ପଡିଶାରେ ପଣା ବାଣ୍ଟିଦେବା

ଗଛରେ ଢାଳିବା ପାଣି,

ଖାଇବାକୁ ଦେବା ପିଇବାକୁ ଦେବା

ତୋଷ ହେବେ ବୁଲା ପ୍ରାଣୀ ।

ସାରା ଜଗତର ମଙ୍ଗଳ ହୋଇଲେ

ନିଜର ମଙ୍ଗଳ ହେବ,

ଓଡ଼ିଆ ସଂସ୍କୃତି ପ୍ରଥା ପରମ୍ପରା

ଦେଶେ ଦେଶେ ଗୁଞ୍ଜରିବ ।