ପିତାମାତା ଚଳନ୍ତି ଠାକୁର

ଦେଉଳେ ଦେଉଳେ କାଠ ପାଷାଣର

     ଦେବଦେବୀ ପୂଜା କଲି

ବର୍ଷ ବର୍ଷ ଧରି ଜଳ ଢାଳି ଢାଳି

     କିଛି ଫଳ ନପାଇଲି |

କୁମ୍ଭମେଳା ଗଲି ଗଙ୍ଗା ସ୍ନାନ କଲି

     ଗଲି କାଶୀ ବୃନ୍ଦାବନ

ବୁଲି ଚାରିଧାମ ଭାରତ ଭ୍ରମଣ

     କଲି ତୀର୍ଥ ପର୍ଯ୍ୟଟନ |

ଜପ ତପ ଦାନ ଶାସ୍ତ୍ର ଅଧ୍ୟୟନ

     କଲି ବ୍ରତ ଉପବାସ

ସତସଙ୍ଗ କଲି ସାଧୁ ସେବା କଲି

     ନପୂରିଲା ଅଭିଳାଷ |

ଜଳ ଛତ୍ର ଦେଲି ପାରାୟଣ କଲି

    କଲି ଯଜ୍ଞ ଅନ୍ନଦାନ

ଯେତେ ଯାହା କଲି ଫଳ ନପାଇଲି

    ସବୁ ହେଲା ଅକାରଣ |

ଏତେ କଲା ପରେ ପଡ଼ିଲା ମନରେ

    ଗୁରୁଜୀଙ୍କ ପଦେ କଥା

ପିତାମାତା ପରା ଚଳନ୍ତି ଠାକୁର

    ତାଙ୍କ ପଦେ ଦିଅ ମଥା |

ଭ୍ରମ ଗଲା ଛାଡ଼ି ଆସିଲି ଦଉଡ଼ି

   ପୂଜିଲି ମୋ ପିତା ମାତା

ପଦ ସେବା କଲି ପ୍ରସାଦ ଅର୍ପିଲି

    କଲି ତାଙ୍କ ହିତ ଚିନ୍ତା |

ଶତ ଆଶୀର୍ବାଦ ପୀୟୂଷ ପୟୋଦ

   ଢାଳି ଦେଲେ ମୋର ଶିରେ

ସୁଖ ଗନ୍ତାଘର ଛିଣ୍ଡି କି ପଡ଼ିଲା

   ମୋ ଅଭାବୀ କୁଟୀରରେ |

ଚାକିରୀ ମିଳିଲା ବାନ୍ଧବୀ ମିଳିଲା

   ସୁତା ସୁତ ପରିବାର

ସ୍ୱର୍ଗ ପରି ଘର ଝଲସି ଉଠିଲା

   ଖେଳିଲା ଖୁସି ଲହର |

ପିତା ମାତା ଠାରୁ କିଏ ଅଛି ଗରୁ

   ସେ ତ ପିଣ୍ଡର କାରଣ

ମାତା ପୃଥ୍ଵୀ ଠାରୁ ଅଟନ୍ତି ଯେ ଗରୁ

   ପିତା ସ୍ଵର୍ଗୁ ଗରୀୟାନ |

ପିତା ମାତା ସେବା ପାଇଁ ମନ ଦେବା

   ଆନେ ନାହିଁ ପ୍ରୟୋଜନ

ଏ ଯୁଗ ଶିକ୍ଷିତ ଶିକ୍ଷିତା ସମାଜେ

    ଏଇ ମୋର ନିବେଦନ ||