ପିଲାଦିନର ଆଇମା କାହାଣୀ

କାଚକେନ୍ଦୁ ପଦୁଅଁ ପୋଖରୀ ପାଣି

ସାତତାଳ ପଙ୍କତଳେ ଗହୀରରେ ପୋତା ,

ପିଲାଦିନ ଆଇମାଆ କାହାଣୀରେ

ମରେନାହିଁ ଫୁଲଗଛ ସରେନାହିଁ କଥା ।

ସ୍ବପ୍ନ ରାଜକୁମାରୀଙ୍କୁ ପାଇବା ଆଶାରେ

ଆଖିରୁ ହଜଇ ନିଦ ରୁଚେନାହିଁ ଖାଦ୍ଯ, 

ଭ୍ରମି ଭ୍ରମି ଗହନ କାନନ ବନେ

ଗଣନ୍ତି ରାଜକୁମର ଅନେକ ପ୍ରମାଦ ।

ଲଭି ବର ଶୁଭାଶିଷ ଖଡଗ କଠଉ

ଦୁଃସାହସ ଅଭିଯାନ ଚାଲେ ଦିଗବିଜୟ ,

ପବନର ଗତି ଠାରୁ ଅଧିକ ବେଗରେ

ମନପବନ ତୁରଗ ଧାଏଁ ଅହରହ ।

ପଙ୍କତଳେ ମୁଦା ଏକ ସୁନାର ଫରୁଆ 

ଭିତରେ ତା ଅସୁରୁଣୀ ଜୀବନ ନାଟିକା ,

ଉଡିଗଲେ ଭିତରୁ ସେ କଳା ଭଅଁରଟା

ପ୍ରାଣଛାଡେ ବିକଟାଳ ଅସୁରୀ ଦୁର୍ଦ୍ଦାନ୍ତା ।

ସତସତ ଆଗତ କଥା ବଖାଣେ

ରାଜକୁମାରୀଙ୍କ ଆଗେ ପୋଷା ଶୁଆଶାରୀ ,

ପ୍ରାସାଦ ସମ୍ମୁଖେ କେନ୍ଦରା ବଜାଉଥିବା

ଯୋଗୀଟିକୁ ଦାସଦାସୀ ନେଇଯାନ୍ତି ଧରି ।

ଚାହୁଁ ଚାହୁଁ ବିତିଯାଏ ଦୁଃଖ ଦିନ

ସୁଖବେଳା ଜୀବନରେ ଆସିଥାଏ ଫେରି ,

ଆନନ୍ଦ ଉଲ୍ଲାସ ମନେ ନଅରକୁ

ଲେଉଟନ୍ତି ସ୍ବପ୍ନ ରାଜ କୁମର କୁମାରୀ ।