ପିଲା ଦିନକୁ ଫେରିଯିବା

ଜୀବନ ଜଂଜାଳ ବୋଝ ଥୋଇ ଟିକେ

ଶାନ୍ତିରେ ନିଶ୍ୱାସ ନେବା,

ସମୟର ପହି, ପଛୁଆ ଘୂରେଇ,

ପିଲା ଦିନକୁ ଫେରିବା । [୧]

ଥାଟ ବାଟ ଛାଡି, ଚାଲ ଯିବା ଚାଲି

ମନ-ଫୁଲର ସହରେ ,

ମଜା କେତେ ଟିକି ସ୍ମୃତି-ପ୍ରଜାପତି

ପଛୁ ଲୁଚି ଧରିବାରେ। [୨]

ଲୋଭ ଗରବ ଓ ଈରିଶା ଭାବକୁ

ଫିଙ୍ଗିଦେବା ମୁଠା ଖୋଲି ,

ସରଳିଆ ଶିଶୁ ଚପଳତା ପଣ

ଭରି ନେବା ମନ ଭରି । [୩]

କେଡେ ସୁନ୍ଦର ସେ ଖିଆଲି ଜୀବନ

ଅଜବ ଅବୁଝା କ୍ଷଣ,

ଆକାଶର ଜହ୍ନ ତୋଳି ଆଣି ହାତେ-

ଧରିବା ଅଝଟ ପଣ । [୪]

ମନରେ ନଥିଲା ଛନ୍ଦ- କପଟତା

ପର-ଆପଣାର ଭାବ,

ସେନେହର ଭାଷା ବୁଝି ହେଉଥିଲା

ମଧୁର ସେ ଅନୁଭବ । [୫]

ଧୂପ ଖରାଟାରେ କଙ୍କି, ପ୍ରଜାପତି,

ଧରିବାର କେତେ ମଜା,

ନିଜ ଛାଇ ପଛେ ଧାଇଁ ଧାଇଁ, ତଳେ

ପଡିବା ବୋକାମୀ ସଜା । [୬]

ବଉଳ ସାଥିରେ କଣ୍ଢେଇ ଖେଳରେ

ପୁଅ ଝିଅ ବାହାଘର,

ବାଲିଘର କରି ଖେଳନା-ହାଣ୍ଡିରେ

ଭାତ, ତରକାରୀ ଝୋଳ। [୭]

ମାଆକୁ ଲୁଚେଇ, ଅମୂଲୁ, ଆଚାର,

ଖଞ୍ଜରେ ଖାଇବା ମଜା,

ସାଙ୍ଗ ମେଳେ ଯାଇ କଞ୍ଚା-ଆମ୍ବ, କେନ୍ଦୁ,

ତେନ୍ତୁଳି, କଇଥ ଖୋଜା । [୮]

ଝିଟିପିଟି ବଢି କୁମ୍ଭୀର ହୁଅନ୍ତି,

ବିଲେଇ ବଢିଲେ ବାଘ,

ହସ ଲାଗେ ଏବେ ଭାବି; ସେ ସରଳ

ମାନସିକତାର ଭାବ । [୯]

ସଂସାର ଜ୍ୱଳନ, ଦୁଃଖର ଶ୍ରାବଣ

ଅପହଞ୍ଚ ଯହିଁ ଥିଲା,

ହସ ଖୁସି ଭରା ବିହ୍ଵଳିତ ମନ

ଆହାକି ସୁନ୍ଦର ଭଲା ! [୧୦]

ତେଜି ଦେବି ସବୁ ଧନ-ଦଉଲତ,

ପ୍ରଜ୍ଞା, ପ୍ରତିପତ୍ତି, ମାନ ,

ପ୍ରତିବଦଳେ ମୋ ପ୍ରିୟ ପିଲାଦିନ

ଆଣି ଦିଅ ଭଗବାନ ! [୧୧]