ଫୁଲ ଚାଙ୍ଗୁଡି

ଜହ୍ନଠୁ ଫୁଲେଇ ଫଗୁଣରେ ପ୍ରିୟା 

   ଚାଲି ରାଜହଂସୀ ପରି

 ମନ ଆକାଶରେ  କରେ ବିଚରଣ 

   ଚାଙ୍ଗୁଡିରେ ଫୁଲ ଭରି ।

ଗୋଲଗାଲ ମୁହଁ ଡଉଲଡାଉଲ

   ଦିଶଇ ଭାରି ସୁନ୍ଦର

ବୋଳି ହୋଇଥାଏ ସରାଗେ ତା ମୁହେଁ

   ଅବିର ନାନା ରଙ୍ଗର ।

ସିନ୍ଦୂର ଲୋହିତ ରଙ୍ଗେ ତାର ମୁହଁ

  ଉଜ୍ଜ୍ୱଳେ ସେନେହ ପ୍ରେମେ

ଶ୍ୟାମ ସବୁଜିମା ଜୀବନ ଆନନ୍ଦ

  ନୀଳ ନୀଳିମାକୁ ଜିଣେ ।

Advertisement

>

ଚନ୍ଦନ ସୁବାସ ବାସେ ମହମହ

  ଝରେ ପ୍ରୀତି ସୁଧା ମଧୁ

କୋକିଳ କଣ୍ଠରେ ଶୁଭେ କୁହୁ ତାନ

  ଉଦେ ସତେ ପୂର୍ଣ୍ଣ ଇନ୍ଦୁ ।

ଶୋଭେ ଆମ୍ରକୁଞ୍ଜ ବଉଳର ବାସ୍ନା

  ଯୂଇ ଯାଈ ମଲ୍ଲୀ ହେନା

ହଳଦୀ ବସନ୍ତ ସମ୍ଭାଷେ ମଧୁର

  ପ୍ରିୟ ପ୍ରିୟା ଆନମନା ।

ମଧୁ ବସନ୍ତରେ ବରଷେ ଅମୃତ

  ରାଧାକୃଷ୍ଣ ପ୍ରେମ ଡୋରି

ମଧୁର ସମ୍ପର୍କେ ହୁଅନ୍ତି ଆବଦ୍ଧ

  ସାଥି ବନ୍ଧୁ କୋଳାକୋଳି ।

   -----------