ପହିଲି ପ୍ରେମ

ଆଦ୍ୟ ଯୌବନର ମିଠା ପୁଲକରେ

   ପୁଲକିତ ମୋର ମନ

ପହିଲି ପ୍ରେମର ମିଠା ଛୁଆଁ ପାଇଁ

  ବ୍ୟାକୁଳିତ ମୋର ପ୍ରାଣ

ଖୋଜୁଅଛି ସାଥି ଆଖି ଦିନରାତି

   ଭିଜି ପ୍ରୀତି କାମାଗ୍ନିରେ

ପ୍ରତି ମୁହୂର୍ତ୍ତରେ ମିଠା ଶିହରଣ

   ଜାଗିଅଛି ହୃଦୟରେ

ମନ ଉପବନେ ପ୍ରୀତି ଫୁଲଟିଏ

  ଫୁଟିଅଛି ଜୀବନରେ

ମିଠା ମହକରେ ସୁବାସିତ ହୋଇ

   ନାଚୁଅଛି ଆନନ୍ଦରେ

ଜହ୍ନର କିରଣ ଭିଜାଉଛି ମନ

  ଆଖିତଳେ କେତେ ସ୍ୱପ୍ନ

ରଙ୍ଗର ପସରା ଲାଗୁଅଛି ତୋରା

  ଫଗୁଣର ପଦଚିହ୍ନ

ଏକା ଏକା ଭିଜେ ପ୍ରେମର ବର୍ଷାରେ

  ସାଥି ବିନା ନୀରବରେ

ପ୍ରଥମ ପ୍ରେମର ରଙ୍ଗରେ କିଏ ସେ

  ଭିଜାଇବ ମୋତେ ଥରେ