ହୁଅନ୍ତା ପ୍ରଣୟିନୀ

ପାଦରେ ଅଙ୍କା ସରୁ ଅଳତା ଚୁପି ଚୁପିକା ଚାଲି 

ପ୍ରେମ ଚକୋରି ମନ ମୟୂରୀ ମରମେ ମାରେ ଭାଳି 

ଚାରୁ ଲବଙ୍ଗଲତା

ରୁଣୁ ଝୁଣୁ ତା ନୂପୁର ତାନ ବଢ଼ାଏ ଅଧିରତା |

ହସରୁ ଝରେ ଗଜ ମୁକୁତା ଓଠରୁ ଝରେ ମହୁ

କଳକଣ୍ଠିନୀ ମଧୁଭାଷିନୀ କଥାରେ ହୃଦ ଦହୁ

କାନ୍ତି ତା ଦାଉ ଦାଉ

ରସାଣ ସୁନା ବର ବରନା କମଳ ନାଳ ବାହୁ |

ଖଞ୍ଜନ ଜିତା ଅଞ୍ଜନ ନେତ୍ରା ଭ୍ରୂଲତା ମାର ଧନୁ

ଚାଲିଲେ ଥରେ କେ ଦେହ ଧରେ ଲଭି ପୁରୁଷ ତନୁ

ଅଙ୍ଗୁଳି ଚମ୍ପା କଳି

ହରି କଟିନୀ ଗଜ ଗାମିନୀ ରମ୍ଭୋରୁ କାମଥଳି |

ନବ ଅଙ୍କୁର ଉରଜ ଧର କାମ କଳସ ଶୋଭା

ଇନ୍ଦୁ ବଦନା କୁନ୍ଦ ରଦନା ଜବା ଅଧର ଲୋଭା

ମଲ୍ଲୀ ଗଜରା ଗଭା

କାଳିନ୍ଦୀ ଜଳ ଜିଣି କୁନ୍ତଳ ନିତମ୍ବ ଚୁମ୍ବି ପ୍ରଭା |

ମେଘ ଅମ୍ବରୀ ସେ କୃଶୋଦରୀ ଯୁବା ନୟନ କାରା

ଶୋଭାକୁ ଡରି ସୁର ସୁନ୍ଦରୀ ପଳାଇଯିବା ସାରା

ନଖରୁ ଶିଖା ଯାଏ

ରୂପ ନଈରେ ଯୌବନ ବନ୍ୟା ଉତକୂଳ ହୋଇ ଧାଏଁ |

ରସା ସରସା ଏ ରସାଳସା ହୁଅନ୍ତା ପ୍ରଣୟିନୀ 

ସରଗ ଶଶୀ ପଡ଼ନ୍ତା ଖସି ସଙ୍ଗରେ କାଦମ୍ବିନୀ 

ଇନ୍ଦ୍ର ସମ୍ପଦ ଛାର

ପାଦରେ ମୁହିଁ ଦ୍ୟନ୍ତି ଏଡ଼ାଇ ବରୁଣ ରତ୍ନାଗାର |

ଅଭିସାରିକା ଏ ରୂପାମ୍ବିକା ପ୍ରେମ ସାଗରେ ଭାସି

ପ୍ରୀତି ନାବରେ ପରିରମ୍ଭରେ ସାଉଁଟି ସୁଖରାଶି

ମାତି ଦିବସ ନିଶି

ଜୀବନ ଧନ୍ୟ ହୁଅନ୍ତା ଗଣ୍ୟ ସୌଭାଗ୍ୟ ଯାନ୍ତା ଦିଶି |