ଫଗୁଣ ପୀରତି

ଫଗୁଣ ଦିନର ପୀରତି ମହନୀ

ନୁରୁଛେ ଆଏଜ ସଙ୍ଗାତ

ଝାର ଜଙ୍ଗଲେ କୁଇଲି ସୁରେ ତାନେ

ଫୁଟଲା ଜାଇ ଫୁଲ ମିତ

ଫଗୁଣ ଆଏଲା ପ୍ରେମ ରଙ୍ଗ ନେଇ

କଅଁଳି ଧୂକା ଦିହେ ମାଖି

ପତର ଝରି ଫେରଗା ପାଆଁଲିବା

ନୂଆ ଫୁଲେ ହଳଦୀ ମାଖି

ଧରତୀ ରସେନ ନୂଆ ଭୁଆସେନ

ସାଗୁଆ ପାଟେ ଲାଲ ଖୁପା

ମହକି ମହକି କହଁରୀ ଯାଉଛେ

ଭମର ସାଙ୍ଗେ ତାର ଦେଖା

ଗହ ଗହ ହେଇ ଆଏଲା ବଉଳ

ଝାର ତରା ନେ କଁହରୁଛେ

ମହୁଲ ରାନୀ ମହୁରୀ ସୁରେ ବୁଡି

କିନ୍ଦିରୀ ଡେଂହକି ନାଚୁଛେ

ଲାଲ ଟହ ଟହ ଫଳସା ସଜନୀ

ଉତକିଲା ପୀରତି ଧରି

ଫଗୁଣ ଆଏଲା ପସରା ମେଲେଇ

ପ୍ରେମ ପୀରତି ଗଡେ ଭରି ।।