ଗୁରୀ ନନୀ

ନନୀ କାଏଁ ଜରଡ଼ା ଝୁରି

ଟିଙ୍ଗ ଲପ ଲପ ଡେଗୁଛ

ଗୁରୀ ନନୀ କେନୁ ଉଦଳ

କିନ୍ଦିରୀ ଦେହଁକି ନାଚୁଛ ।

ମାରିଲି ଲେଦା ଝରଲା କେଁ

ମନ ଗଛ ର ମିଠା ଆମ

ଆଁ ରେ ନନୀ ବୁଲେଇ ନେମି

ସରଳା କାଏ ତୋର କାମ ।

ତମର ବୁଢ଼ା ଲୁଂଘି ପିନ୍ଧି

ଦୁଆରେ ହେଲା କାଏ ଠିଆ

ଖଟ ପାରି କରି ରଖିଥା

କହିଦେ ଇ ଆଡେ ବସିଆ ।

ଘିନି ଦେମି ଫୁଲ ଗଜରା

ପିନ୍ଧାମି ଲାଲ ପାଟ ଶାଢ଼ୀ

ବୁଲେଇ ନେମି ବସାମି ଗା

ମିନା ବଜାରେ ଗଖା ଗାଡି ।

ଦେଖ ରେ ନନୀ ଥପ ଥପ

ଥିପଲାନ ନାକୁ ଶିଗନ

ପଣତ କାନି ନେ ପୁଛି ଦେ

ବାଇବିଛ ହେଲା ଇ ମନ ।

ଚାଲ ଦେଖିଯିମା ଗାଁ ଖୁଲୀ

ସାଂପୁଆ କକା ଆଇଲାନ

ନାଇ ଛାଡ଼ିବୁ ମୋର ହାତ

ନିଁହେଲେ ସାପ ଗିଳବାନ ।

ହଳଧରିଆ ଲେଁହଟିଲା

ଦେଖି କରି ତୋର ହଳଦୀ

ମଂହକ ମହନୀ କଥାଟେ

ଚାଲ ହେମା ବିହା ଜଲଦି ।

ଗଂଏଠି ମୁଲଖା ଖୁପାନେ

ଦେତି କାଏଁ ଫୁଲ ଟେ ଖୁଛି

ତୋର ବାଟ ଚଲା ରୁଡେ ଗୋ

ଦେମି କେଁ ଗୁଳା ଫୁଲ ବିଛି ।

କଳିଆ ଵାଲେ ପଂରା ଫୁଲ

ଗଖା ଗଖା କାନ ଝୁମକା

ଚାଲି ତୋର ରସ ଝରନା

ରସାଲା ଇ ଅଣ୍ଟା ମଲକା ।