ଫଗୁଣ ଫେରିଛି ପ୍ରକୃତି କୋଳକୁ

ଫଗୁଣ ଫେରିଛି ପ୍ରକୃତି କୋଳକୁ ଘେନି ରଙ୍ଗର ଫାଲ୍ଗୁନୀ

ପ୍ରୀତିରଫଲ୍ଗୁରେ ଭିଜି ପାଗଳୀ ପିକ ଗାଉଛି ପ୍ରେମର ରାଗୀଣି ।

ପହିଲି ଫଗୁଣର ପରଶ ପାଇ ପ୍ରସ୍ଫୁଟିତ ପୁଷ୍ପ କଳି

ଫଗୁ ଫରୁଆର ପସରା ସଜେଇ ପୁଲକିତ ପୁରପଲ୍ଲୀ ।

ଶୀତକୁ ବିଦାୟ ଦେଇ ଆଗମନ କରିଛି ଋତୁରାଜ ବସନ୍ତ

ସବୁଜପାଟ ପିନ୍ଧିବ ଧରିତ୍ରୀ କଅଁଳି ଉଠିବ ନୂଆପତ୍ର ।

ବସନ୍ତର ପହିଲି ଆଭାସ ପାଇ ହସୁଛି ସଂଜୁଆ ଆକାଶ

ମୃଦୁମଳୟ ସମୀରେ ମହକି ଯାଉଛି ଆମ୍ର ବକୁଳର ବାସ ।

ଅଶୋକ ପଳାଶ ତରାଟ ମଧୁମାଳତୀର ବାସ ଯିବ ଚହଟି

ଶୀତଳ ଜ୍ଯୋସ୍ନାରେ ଭିଜିବ ଧରା ଚମକିବ ଚାନ୍ଦିନୀ ରାତି ।

ଅଭିର ଖେଳିବେ ଦୋଳଗୋବିନ୍ଦ ସଙ୍ଗେ ରାଧୀକାରାଣୀ

ଦର୍ଶନ ଦେବେ ଦାମୋଦର ପଞ୍ଚୁଦୋଳରେ ବିଜେ ହୋଇ ।

ନାଚିବେ ଘଣ୍ଟ ପାଟୁଆ ହେବ କୀର୍ତ୍ତନ ବାଜିବ ଝାଞ୍ଜ ମୃଦଙ୍ଗ

ଧରି ପିଚକାରୀ ଖେଳିବେ ହୋଲି ପୁଅ ଝିଅ ହୋଇ ସାଙ୍ଗ ।

ହୋଲିର ଏ ପର୍ବ ପ୍ରତୀକ ବସୁଧୈବ କୁଟୁମ୍ବକମ୍ ମନ୍ତ୍ରର

ଅବିରର ରଙ୍ଗ ପ୍ରତୀକ ଭାତୃଭାବ ଆଉ ସଂସ୍କୃତିପ୍ରୀତିର ।