ଫଗୁଣ ଖେଳୁଛି ହୋଲି

ଛାତିତଳେ ମୋର ବିଶାଳ ଆକାଶ

ତୁ ଏକ ଉଡନ୍ତା ପକ୍ଷୀ

ଛୁଇଁ ପାରିନାହିଁ ତୋ ମନକୁ ସିନା

ପଡିଛି ତୋ ପ୍ରେମେ ସଖୀ I

ଫଗୁରେ ଫଗୁଣ ଖେଳିଲାଣି ଖେଳ

ଆକାଶେ ଲାଗିଛି ନିଆଁ

ଦେହର ଦହନ ବଢିବଢି ଯାଏ

ପାଇବାକୁ ପ୍ରୀତିଛୁଆଁ I

ତୋ ଓଠରୁ ଯେବେ ଫଗୁଣ ଝରଇ

ରଙ୍ଗରେ ଭିଜାଇ ଦେଉ

ଅଜାଣତେ ମୋର ଶ୍ରାବଣ ହୋଇ ତୁ

ଆଖି କୋଣୁ ଝରିଯାଉ I

ମାଗିଥିଲି ପରା ଆଲୁଅ ଟିକିଏ

ଦେଲୁ ତୁ ଅନ୍ଧାର ରାତି

ହୃଦୟରେ ତୋତେ ରଖିଛି ବୋଲି ମୁଁ

ଚିରୁଛୁ ନିତି ମୋ ଛାତି I

ଫଗୁ ପୁନେଇଁର ଜହ୍ନ ନିରବରେ

ରହିଥିଲା ମୋତେ ଚାହିଁ

ତୋ କୁଶଳ ବାର୍ତ୍ତା ପଚାରିଲି ତାକୁ

କିଛି ବି କହିଲା ନାହିଁ I

ଫୁଲରେ ଫୁଲରେ ରଙ୍ଗର ବିପଣୀ

ଫଗୁଣ ଖେଳୁଛି ହୋଲି

ଭାବିଛି ତୋଦେହେ ଦେବି ନାନା ରଙ୍ଗ

ଓଠରେ ବୋଳିବି ନାଲି I