Library
Profile
ଫଗୁଣ ଆସିଛି ଫେରି...
ଫଗୁଣ ଆସିଛି ଫେରି...
1 min
308
କମି ଆସିଲାଣି ଶୀତର ପ୍ରକୋପ
ରଙ୍ଗର ପସରା ଧରି,
ମଳୟ ପବନେ ନାଚି ନାଚି ପୁଣି
ଫଗୁଣ ଆସିଛି ଫେରି ।
ଚଉଦିଗ ବାସେ ବଉଳ ବଉଳ
ପିକ କଣ୍ଠୁ ଝରେ ଗୀତି,
ବାଟବଣା ହୋଇ ଫୁଲରୁ ଫୁଲକୁ
ଉଡିବୁଲେ ପ୍ରଜାପତି ।
ମଧୁମାଳତୀର ହସହସ ମୁହଁ
ରଜନୀଗନ୍ଧାର ଲାଜ,
ପ୍ରେମର ରଙ୍ଗରେ ରଙ୍ଗେଇ ହେବାକୁ
ହଳଦୀ ବସନ୍ତ ସଜ ।
ତରୁଣ ଅରୁଣ କଅଁଳ କିରଣ
ଉଷୁମ କିଶୋର ମନ,
ଜହ୍ନ ଜୋଛନାରେ ଉଛୁଳି ପଡଇ
କିଶୋରୀର ଯଊବନ ।
କୁଞ୍ଜେ ଭରିଲାଣି ବିବିଧ ସୁମନ
ପ୍ରତି ମନ କୃଷ୍ଣ ମୟ,
ମୋହନ ସ୍ୱନରେ କି ଯାଦୁ କେଜାଣି?
ଭାଙ୍ଗଇ ରାଧିକା ଲୟ !
କବିର ଲେଖନୀ ଚିତ୍ରକର ତୂଳୀ
ପ୍ରେମର ରଙ୍ଗକୁ ଭରି,
କବିତା ପଂକ୍ତିରେ ଛବି କଳେବରେ
ଫଗୁଣ ଆସିଛି ଫେରି ।
©® Reserved
ସନ୍ତୋଷ କୁମାର ନାୟକ
