ଫଗୁଣ ଆଗମନେ ସନ୍ଧ୍ଯା
ଫଗୁଣ ଆଗମନେ ସନ୍ଧ୍ଯା
ଫଗୁଣ ଆଗମନେ ସନ୍ଧ୍ଯା ର ଇର୍ଷା
ଶାନ୍ତ ପରିବେଶ କୁହେ ଅଶାନ୍ତ ର ଭାଷା
ମନ ମତାନ୍ତର ଧୂଳି ଘୁର୍ଣ୍ଣିଝଡ
ଢାଳେ ଆଜି ପୁଣି ଲୁହ ର ବର୍ଷା ।
ବୁନ୍ଦା ବୁନ୍ଦା ଜଳ ସ୍ପର୍ଶ କରି କୁହେ
ଅତୀତ କାହାଣୀ ରାଜରାସ୍ତା ରେ ବହେ
ସାରା ଦେହ ଥିଲା ଓଦା ଜୁଡୁବୁଡୁ
ଚକ୍ଷୁ ସାଗର ଶୁଷ୍କ ମରୁଭୂମି ରୁହେ ।
କଥା ଦେଇ ଯାଇ ଫେରିଲା ଫଗୁଣ
ହେଲେ ପ୍ରେମ ପ୍ରତିଜ୍ଞା ଯେ ଭାଙ୍ଗିଛି ରାଣ
କେମିତି କହିବ ସ୍ୱପ୍ନ ପାଲଟିଛି ଅଗ୍ନିପିଣ୍ଡୁଳା
ସୁନିଶ୍ଚିତ ଯୁଦ୍ଧ ପାଇଁ କରିଛି ପଣ ।
ଘମାଘୋଟ ବର୍ଷା କୁ ଝଡ ତୋଫାନ
ଘଡଘଡି ଶବ୍ଦ ରେ କମ୍ପମାନ ଗଗନ
ମନ ରେ ବାନ୍ଧୁଥାଏ ଶବ୍ଦ ମେଞ୍ଚା ମେଞ୍ଚା
ଶବ୍ଦ ଆଙ୍କୁଥାଏ ପ୍ରତି ମୁହୂର୍ତ୍ତ ର ଚିହ୍ନ।
ନା ଥିଲା ଡର ଘୂର୍ଣ୍ଣିଝଡକୁ
ନା ଥିଲା ଡର ବତାସ ବିଜୁଳି କୁ
ଜନ୍ମ ନଉ ଥିଲା ନୁଆ ନୁଆ ପୃଷ୍ଠା
ଆଉ ମୁଁ ପଢୁଥିଲି ସଂପର୍କ ର ଇତିହାସ କୁ ।