ଫେରି ଚାହିଁବନି ବାପୁ

ତୁମେ ଚାଲିଗଲ ବାପୁ ସିନା ତୁମ ମୁଣ୍ଡ ବହୁ ମୂଲ୍ୟବାନ

ଭୋଟ କିଣୁଛି ନିର୍ବାଚନେ ଦୋଷୀ ଅଦାଲତେ ନିଷ୍କାସନ

ତୁମେ ମନେପଡ଼ ବରଷକେ ଦିନେ ଦୁଇ ଅକ୍ଟୋବର ଦିନ

ତୁମ ମୁଣ୍ଡ କିନ୍ତୁ ଘୁରୁ ବୁଲୁଥାଏ ବାର ମାସ ରାତି ଦିନ

କୁଟୀର ଶିଳ୍ପର ପ୍ରଚାରକ ତୁମେ ଭାରି ଶିଳ୍ପ ଭାରି ପଡେ

ଖଦୀ ଶିଳ୍ପ ତୁମ ଖଟିଆ ଧରିଛି ଅରଟକୁ କିଏ ଲୋଡ଼େ

ତୁମେ ସିନା ନିଶା ନିବାରଣେ ବ୍ରତୀ ମୁଣ୍ଡ ତୁମ କାଉଣ୍ଟରେ

ଗଳିଗଲେ ନିଶା ବଢ଼ି ଯାଏ ବାପୁ ତୁମକୁ କିଏ ପଚାରେ

ନିଶାର୍ଦ୍ଧରେ ନାରୀଟିଏ ଚଳାଚଳ ତୁମ ରାଇଜେ ସପନ

ବିଚ୍ ବଜାରରେ ଧର୍ଷଣ ହେଉଛି ସର୍ବ ସମକ୍ଷରେ ଜାଣ

ତଳ ମୁହାଁ କେବେ ଚାହିଁବନି ତୁମ ପ୍ରିୟ ଭାରତ ଭୂମିକୁ

ପ୍ରଚକ୍ଷୁ ତୁମର ପ୍ରତ୍ୟକ୍ଷ କରିବ ତୁମ ସ୍ୱରାଜ ସ୍ୱପ୍ନକୁ

ଧର୍ମ ନିରପେକ୍ଷ ସମ୍ବିଧାନ ତୁମ ହିନ୍ଦୁତ୍ତ୍ୱ ରକତେ ରଂଜି

ଛାତ୍ର ଆନ୍ଦୋଳନ ଦବାଇବା ପାଇଁ ପୋଲିସର ଲାଠି ଗୁଂଜି

ତୁମ ସ୍ୱଛତା ଅଭିଯାନ ଆଜି ଟିକସରେ ପରିଣତ

ତୁମ ଚଷମାଟା ଗାନ୍ଧୀ ନୁହେଁ ଆଉ ସ୍ୱଚ୍ଛ ସ୍ୱଚ୍ଛ ଭାରତେ ଚିହ୍ନଟ

ମାନବ ଧର୍ମର ପ୍ରଚାରକ ତୁମେ ସତ୍ୟ ଅହିଂସା ପୂଜାରୀ

ଅସତ୍ୟ ଅନ୍ୟାୟ ଧର୍ମ ପାଲଟିଛି ମଣିଷତ୍ୱ ଶୁଏ ମରି

ଆତ୍ମା ତୁମର ମୋକ୍ଷ ପାଇଯାଉ ମୋହ ଛାଡି ଦିଅ ଦେଶୁ

ତୁମ ଆତ୍ମାରୁ ବିଗଳିତ ଅଶୃ କାହାକୁ ଆଉ ନଦିଶୁ