ଫେରବକି ସତେ ପିଲାଦିନ
ଫେରବକି ସତେ ପିଲାଦିନ
ମନେ ପଡେ ପିଲା ଦିନ କଥା ସାଉଁଟିଲେ ସ୍ମୃତି ଗନ୍ତା ଘର
ପରିବାର ସେନେହ ସରାଗ ଗେହ୍ଲାପଣ ବାଳୁତ କାଳର ।
ଜେଜୀ ମା' ଗପ ପସରାର ବଂଦୀ ଥାଏ ଯହିଁ ରାଜଜେମା
ଅସୁରର ଜୀବନ ନାଟିକା ସାତ ତାଳ ପାଣି ତଳେ ଜମା ।
କକା ଖୁଡୀ ପିଉସୀ ମାଉସୀ ସଭିଙ୍କର ଆଦର ସୋହାଗ
ପଛ କରି ନିଜ ଅପତ୍ୟଙ୍କୁ କରୁଥିଲେ ଆମକୁ ସେ ଆଗ ।
ଚକାଚକା ଭଉଁରୀ ଖେଳର ମାମୁଁ ଘର ଚଉଁରୀ ବେଳର
ମାଇଙ୍କର ଆଦର ଯତନ ଅଜାଆଇ ଯାତକୁ ନେବାର ।
ଦୋଳ ଯାତ ତାଳସଜ ଖିଆ ମକରର ଗୁଡି ମାଂଜା ଦିଆ
ରଜ ଦୋଳି ପୋଡପିଠା ନଦୀ ପଠା ଭୂଇଁ ବରକୋଳି ଖିଆ ।
ଚୋର ପୁଲିସର ମିଛ ଖେଳ ପୁଚି ଖେଳ କୁଆଁର ପୁନେଇଁ
ଭୋଦୁଅରେ ନଦୀ ନାଳ କୁଳେ ମିଛ କଳି ବାଲୁଙ୍କା ବନେଇ ।
ବର କନିଆର ମିଛ ଖେଳ ସଢେଇରେ ମିଛ ତରକାରୀ
ଯାତ୍ରାର ନାୟକ ବେଶ ଅଳତା ରଂଜିତ ତରବାରୀ ।
ଖାତା ଚିରି ବରଷାରେ ଭିଜି କାଗଜର ଡଂଗା ଭସେଇବା
ତିନ୍ତି ବୁଡି ଜର ବାଧକିଲେ ବୋଉ ଠାରୁ ସୋହାଗ ପାଇବା ।
ନେଇ କିଏ ଧନ ଦଉଲତ ତୁଛ ଏଇ ଜୀବନ ଯୌବନ
ଅତୀତର ବ୍ୟତୀତ କାହାଣୀ ଆଣିଦେବ ମୋ ପିଲା ଦିନ !!