ପଦଟିଏ ତୋ ନାଁରେ ପ୍ରିୟା ୪୩

ମନର ମନ୍ଦିର ଭିତରେ

ଭାବନାର ଆରତି ସଜାଡିବି

ନା, ଦେହର ଦେଉଳ କାନ୍ଥକୁ

ନିରିଖେଇ ସମ୍ମୋହିତ ହେବି ?

ମନ୍ଦିରର ଗର୍ଭଗୃହରେ ପ୍ରତିମାକୁ

ହୃଦରେ ବସାଇ ପୂଜା କରିବି

ନା, ମୁଖଶାଳାର କାରୁକାର୍ଯ୍ୟରେ

ନିତି ପ୍ରତି ଚକ୍ଷୁବିଦ୍ଧ ହେଉଥିବି ?

ମନ୍ଦିର ଭିତରେ ଜନ୍ମ ଜନ୍ମାନ୍ତର ପାଇଁ

ସୁଖର ପ୍ରାର୍ଥନା କରୁଥିବି

ନା, ନିତି ପ୍ରତି ମନ୍ଦିର ଗାତ୍ରରେ

ମରଣ ମାଗୁଥିବି ?

ଜାଣେନା, କାରଣ

ମୁଖଶାଳାରୁ ଗର୍ଭଗୃହ ଯାଏଁ

ଖାଲି ତୁମେ ହିଁ ଥାଅ ,

ମୁଁ କୋଉଠି ନ ଥାଏ ।