ପଡିଛି ଅନେକ ଦଶା

କାଆ କାଆ ରାବି ଡାମରା କାଉଟି 

 ସକାଳୁ ନିଇତି ଆସେ 

ଦରଜା ଆମର ନ ଖୋଲିବା ଯାଏଁ 

ଚାଳରେ ସେମିତି ବସେ ।

ହୁକେ ହୋ ରଡନ୍ତି ବିଲୁଆ ପଲକ

ବେଳ ଯେବେ ନଇଁ ଯାଏ

ତରବରେ ଆସି  ନୂଆ ବୋଉ ଆମ

ସଞ୍ଜବତୀ ଜାଳିଦିଏ ।

କିଚିରି ମିଚିରି ଶୁଭୁନାହିଁ ଆଉ

ଦିଶୁନି ଘରଚଟିଆ 

ଡେଣା ଝାଡି ଝାଡି ଖାଇଯାଏ ଯେତେ

ଘରର ଟିକି ଅଳିଆ ।

କୁହୁ କୁହୁ ଗୀତ କୋଇଲି ଗାଏରେ

ବଉଳ ଆସଇ ଯେବେ

ଭାରି ମଜା ଲାଗେ ନକଲ ନେବାକୁ 

ଶୁଭୁନାହିଁ ଆଉ ଏବେ ।

ଡାମରା ହେଉ କିବା ବିଲୁଆ ହେଉ

କୋଇଲି ଘରଚଟିଆ 

ବୋଉ ଲୋ ବୋଉ କହିବୁ ସତ ତୁ

ଆସୁନାହାନ୍ତି ଆଉ କିଆଁ? 

ଗଛ କାଟିକୁଟି ଘର କରାଗଲା 

ଭାଙ୍ଗିଲା ତାଙ୍କରି ବସା

ବଂଶ ବୁଡିଲାଣି ଅଧିକ ଜୀବର

ପଡିଛି ଅନେକ ଦଶା ।