ପାଉଁଶ ତଳର ସ୍ବପ୍ନ
ପାଉଁଶ ତଳର ସ୍ବପ୍ନ
ସ୍ବପ୍ନ ମୋର ଆଜି ପାଉଁଶ ଉଢାଳେ
କୁହୁଳୁଛି ଦିବାନିଶି
ଆଶା ଅସୁମାରୀ ଭୂମିକମ୍ପ ଭଳି
ମାଟିରେ ଯାଇଛି ମିଶି |
ଭାବିଥିଲି ଦିନେ ଜହ୍ନ ରାଇଜରେ
ଗଢିବି ମୁଁ ଗୋଟେ ଘର
ତାରା ମେଳେ ବସି ନିରେଖି ଦେଖିବି
ସ୍ବପ୍ନ ସୁନ୍ଦରୀକି ମୋର |
ନୀଳ ନୟନା ର ନିବିଡ଼ ଚାହାଣୀ
ଖିଲି ଖିଲି ହସ ଖେଳ
ସତେକି ସରଗୁ ଅପସରିଗଣ
ଆସିଛନ୍ତି ହୋଇ ମେଳ |
କି ବର୍ଣ୍ଣିବି ତାଙ୍କ ଅପରୂପ ଶୋଭା
ରାଜହଂସୀ ଧୀର ଚାଲି
ଲକ୍ଷେ ସୁଷମା କୁ ପଛରେ ପକାଇ
ପସରା ଦେଇଛି ମେଲି |
ଶୁଦ୍ଧ ସୁବର୍ଣ୍ଣରେ ଗଢ଼ାକି ଶରୀର
ଅପରୂପ ତେଜ କାନ୍ତି
ଅୟୁତ ଦୀପାଳି ଫିକା ପଡ଼ିଯାଏ
ଦରଶନେ ମିଳେ ଶାନ୍ତି |
ଏମିତି ସପନେ ଭିଜି ଭିଜି ମୋର
ରାତିଟା ଯାଇଛି ପାହି
ଖବର ପାଇଲି ବାପା ମୋର ଆଉ
ଏଇ ଦୁନିଆରେ ନାହିଁ |
ଖବର ଶୁଣି ମୁଁ ଝଡ଼ ଟିଏ ଭଳି
ପହଂଚିଲି ଘରେ ଯାଇ
ଦାଣ୍ଡ ଦୁଆରରେ ଅଚିନ୍ତା ନିଦ୍ରାରେ
ବାପା ପଡିଛନ୍ତି ଶୋଇ |
ଛଖଣ୍ଡି କାଠରେ କୋକେଇ ବାନ୍ଧନ୍ତି
କୁଟୁମ୍ବ ସାହି ପଡିଶା
ବାପାଙ୍କ ସାଥିରେ ବିଦାୟ ଘେନିବ
ସବୁ ମୋ ଆଶା ଭରସା |
ତାସଙ୍ଗରେ ପୁଣି ବୋଉ ହାତ ଶଙ୍ଖା
ନାଲି ସିନ୍ଦୁର ର ଟୋପା
ସବୁ ନେଇ ଏବେ ସ୍ୱର୍ଗ ଦ୍ୱାର ଯିବେ
ସଂସାର ଛାଡିକି ବାପା |
ଦେଖି ଶୁଣି ସବୁ ଘୂରୀଗଲା ମଥା
ପଡିଲି ମୁଁ ଓଳିତଳେ
ସ୍ବପ୍ନ ମୋର ଯେତେ ଚିରଦିନ ପାଇଁ
ରହିଲା ପାଉଁଶ ତଳେ |
🟣🟣🟣🟣🟣🟣🟣🟣