ପାର୍ବଣ-୨୦୨୨

କାଶ ଫୁଲ ବଳାହକବଳି ମାଳ

ମାଳ ଯହିଁ ଦେଖ ତହିଁ

ଆସିଛି ପାର୍ବଣ ମାଆ ଆସିଛନ୍ତି

ମରତ ଧାମେ ଓହ୍ଲାଇ ।

ନିବାରିବେ ଦାନବ ଶକତି

ପ୍ରଚରିଛି ଶୁଭ ଆଗମନୀ

ଧରାଧାମ ହେଲା ପାବନ

ଶବଦ ଶୁଭେ ଜୟ କାତ୍ୟାୟନୀ ।

ସିଂହ ପୃଷ୍ଠେ ବିଜେ ଆଦିମାତା

ହସ୍ତେ ତାଙ୍କ ଶଙ୍ଖ ଚକ୍ର ଧରି

ତ୍ରିଶୂଳାଦି ଅସ୍ତ୍ର ଶସ୍ତ୍ର ସହ ଉଭା

ମହିଷାସୁର ସଂହାରି ।

ଉଦ୍ଧରିବେ ଧରା ଭାର ସ୍ବାଗତିକା

ଧ୍ୱନିରେ ପୂର୍ଣ୍ଣ ଜଗତ

ଦେବ ନର ନାଗ ଗନ୍ଧର୍ବ କିନ୍ନର

କରନ୍ତି ସ୍ତୁତି ବହୁତ ।

ଜୟ ନାରାୟଣୀ ପରମ କଲ୍ୟାଣୀ

ଶିବେ ସର୍ବାର୍ଥ ସାଧିନୀ

ସରବ ମଙ୍ଗଳକାରିଣୀ ଜନନୀ ଜୟ

ମା ସିଂହ ବାହିନୀ ।

ଶରଣବତ୍ସଳା ତ୍ରିଅମ୍ବିକେ ଗୌରୀ

ଦୀନ ଆର୍ତ୍ତ ନିବାରିଣୀ

ସକଳ ଜନଙ୍କ ଦୁରିତ ନାଶିନୀ

ମାତା ଅଭୟ ଦାୟିନୀ ।

ସୃଷ୍ଟି ସ୍ଥିତି ଲୟ କାରଣ ତୁହି ମା

ଯୋଗାରୂଢ ମହାମାୟୀ

ଶକତି ଭକତି ମୁକତି ଦାୟିନୀ

ବରାଭୟଦାତ୍ରୀ ତୁହି ।

ପାର୍ବଣରେ ମାତା ବରଷେ ବରଷେ

ଆସୁଥାଅ ଅବତରି

ସଂସାରର ପାପ ତାପ ନାଶି ମାତ

କଲ୍ୟାଣ କର ସବୁରି ।

ତୁମ ଆଗମନେ ତୁମ ଦରଶନେ

ଲଭି ତୁମ କୃପା ବାରି

ମାନସ ନିର୍ମଳ ହେଉ ମା ଆମର

କଳମଷ ନିଅ ହରି ।