ଅପେକ୍ଷାର ଅନ୍ୟ ନାମ ଯନ୍ତ୍ରଣା
ଅପେକ୍ଷାର ଅନ୍ୟ ନାମ ଯନ୍ତ୍ରଣା
ଜାଣନ୍ତି ସକଳେ ମରତମଣ୍ଡଳେ
ଅପେକ୍ଷାର ଅନ୍ୟ ନାମ ଯନ୍ତ୍ରଣା
ଗଡ଼ି ଚାଲେ ଯେବେ ସମୟଟି ତେବେ
ଜୁଟିଯାଏ ଆସି ନାନା ଭାବନା ।
ଭଲମନ୍ଦ ଦୁଇ ଆଗେ ଠିଆହୋଇ
ଶୁଣାଏ ତାହାର ହିତ ଅହିତ
ଆଶଙ୍କା ବାତରେ ହୃଦୟ ଭିତରେ
ଟଳମଳ ହୁଏ ଶବ୍ଦ ବହୁତ ।
ନୀରସ ମନରେ ଆଶା ଭରସାରେ
ସଞ୍ଚଇ ସାହସ ନିଜ ଅନ୍ତରେ
ମାତ୍ର ଦକଦକ ଛାତିର ଚମକ
ଧୈର୍ଯ୍ୟକୁ ଭାଙ୍ଗି ଚୂର୍ଣ୍ଣ କରେ ।
ଛଟପଟ ମନ ହୋଇ ପ୍ରତିକ୍ଷଣ
ବେଦନା ସାଥିରେ ତୋଳିକି ଘର
ଅପେକ୍ଷାରେ ଅନ୍ତ ହେବ କି ଜୀବନ
ନ ବାଜି ମିଳନ ବଂଶୀର ସ୍ବର ?
ପଚାରେ ନିଜକୁ କେବେ ବି ଆନକୁ
ଲିଭାଇବା ପାଇଁ ଯନ୍ତ୍ରଣା ନିଆଁ
ଆଶ୍ବାସନା ବାଣୀ ଶୁଣିଦେଲା କ୍ଷଣି
ଥମିଯାଏ ଟିକେ ତା'ର ଛାନିଆ ।
କେବେ ପରିସ୍ଫୁଟ ବିରକ୍ତି ସ୍ବଭାବ
ଅଭିମାନଭରା କଥା ତୁଣ୍ଡରେ
ଗୁଣୁଗୁଣୁ ହୋଇ ନିଜକୁ କହଇ
ଅପେକ୍ଷାଟା ବଡ କଷ୍ଟ ସତରେ !
ଅପେକ୍ଷାର ଅନ୍ତ ଜୀବନେ ଅମୃତ
ଢାଳି ଦିଏ ସତେ କେତେ କେଜାଣି
ଯନ୍ତ୍ରଣା ଘାଆଟା ମିଳନ-ମଲମେ
ଶୁଖି ଗାଇ ଉଠେ ମଧୁ ରାଗିଣୀ ।