ଖେଳ
ଖେଳ
ନଥିଲେ ନାହିଁ ଗୋଟିଏ ଗୋଡ
ଦି ହାତଯାକ ମୋର
ଖେଳିବା ଲାଗି ଫୁଟବଲ୍ ମୁଁ
ହୋଇଛି ଆଗୁସାର ।
ଗୋଟେ ଗୋଡରେ ଡେଇଁ ଡେଇଁ ମୁଁ
ଖେଳିବି ଫୁଟବଲ
ଖେଳ ଖେଳିବି ଖୁସି ହୋଇବି
ଦେହକୁ ହେବ ଭଲ ।
ମନରେ ଅଛି ଅସୀମ ବଳ
ଆନ ପିଲାଙ୍କ ପରି
ପଢିବି ପାଠ ଖେଳିବି ଖେଳ
ଯିବିନି କେବେ ହାରି ।
ଖେଳିବି ଯେବେ ଉଦାହରଣ
ହେବି ମୁଁ ଆନ ପାଇଁ
ଦିବ୍ଯାଙ୍ଗ ବୋଲି ମନରେ କେବେ
ଭାବିବି କାହିଁପାଇଁ ।
ପ୍ରଭୁଙ୍କ ଦାନ ଶରୀର ମୋର
ଯାହା ପାଇଛି ମୁହିଁ
ସେଥିରେ ଖୁସି ନିଜେ ହୋଇବି
ଆନକୁ ଖୁସି ଦେଇ ।
ଏ ମୋର ପଣ ଶୁଣ ସରବେ
ମୋର ଭଉଣୀ ଭାଇ
କାହାକୁ ହୀନ ନଭାବ ମନେ
ଦୁର୍ଦ୍ଦଶା ତାର ଚାହିଁ ।
ଆତ୍ମବିଶ୍ୱାସଟି ବଡ ବଳ
କଲେ ତାକୁ ନିଜର
ଅସାଧ୍ୟ ନିଶ୍ଚେ ସାଧନ ହେବ
ଏଇ ବାରତା ମୋର ।