Library
ପାହାନ୍ତି ପହର ବର୍ଷା
ପାହାନ୍ତି ପହର ବର୍ଷା
ପାହାନ୍ତି ଅସରା ବରଷା କରୁଛି
ପ୍ରକୃତିକୁ ଆଲିଙ୍ଗନ,
ଖୁସିର ଉଚ୍ଛ୍ୱାସେ ନିଶ୍ୱାସରେ ତାର
ମନ୍ଦ ମନ୍ଦ ସମୀରଣ । [୧]
ରିମିଝିମି ମିଠା ସୂର ତୋଳେ
ତାର ପହୁଡର ଗୁଂଜରଣ,
ଝିଙ୍କାରି ଶବଦ, ଭେକର ନିନାଦ
ଜଗାଏ ପଂଚମ ତାନ । [୨]
ସମୀର ଛନ୍ଦରେ କୁସୁମ ପଲ୍ଲବ
ବିମୋହିତେ ନୃତ୍ୟେ ରତ,
ଉଦାସିଆ ଭାବ ଭୂଲି ତାଙ୍କ ସହ
ଝୁମିବାକୁ କହେ ଚିତ୍ତ । [୩]
ବାଡି ବଗିଚାର ଖାଲ ଖମା ପୂରି
ତାଜା ବରଷାର ଜଳେ,
ଟିପି ଟିପି ବିନ୍ଦୁ ସୁନ୍ଦର ସତେଜ
ତରଙ୍ଗ ବଳୟ ତୋଳେ । [୪]
କଳା ଧଳା ମିଶା ଆକାଶେ ଖେଳୁଛି
ଧୂଆଁଳିଆ ଆସ୍ତରଣ,
ତମସାର କଳା ପରଦା ଫାଙ୍କରୁ
ପ୍ରଭାତର ଆଗମନ । [୫]
ତରୁରାଜି ଝଙ୍କା ଉହାଡୁ ଉଡନ୍ତି
ଧବଳ ବକ'ର ପଲ ,
ନଭେ ଝୁଲୁଛିକି ମାଳ ମାଳ ହୋଇ
ରଜନୀଗନ୍ଧାର ଫୁଲ !! [୬]
ଅନିଶ୍ଚିତତାର ବୁକେ ଶୁଭ ସତ
ସପନର ଗୁଂଜରଣ,
ଖିଆଲି ଅନୂଢା ମନରେ ଜଗାଏ
ତାଜା ତାଜା ଶିହରଣ । [୭]
ସେନେହ ଜଡେଇ ଧରଣୀ, ସ୍ୱାଗତ
କରୁଛି ନୂଆ ସକାଳ,
ଦିନଟା ସଭିଙ୍କ କୁଶଳରେ ଯାଉ
ଖୁସିରେ ରହୁ ସଂସାର । [୮]
