ଓଡ଼ିଆ ଜାତିର ଲଢୁଆ ବୀର ଚନ୍ଦନ ହଜୁରୀ

ଶ୍ରୀକ୍ଷେତ୍ର ନନ୍ଦନ ହଜୁରୀ ଚନ୍ଦନ ବାପା ପୁରୀପଣ୍ଡା ରଘୁ,

ଡାକନାମ ପୁଣି ରଖିଥିଲେ ଚାଖି ପୂଜୁଥିଲେ ମହାପ୍ରଭୁ |

ପାଠପଢା ସଙ୍ଗେ ତୀର୍ଥ ଭ୍ରମଣରେ ଲାଗିଥିଲା ପିଲାମନ,

ବିଠୁର ରାଇଜେ ଛବେଲି ସହିତ ମିଶିଥିଲେ କିଛିଦିନ |

ଛବେଲି ହୋଇଲେ ଝାନସୀର ରାଣୀ, ଚନ୍ଦନ ଗଲେ ପାଖେଇ,

ଦରକାର ବେଳେ ଉପଦେଶ ଦେଇ ବିଦ୍ରୋହ ଦେଲେ ମତେଇ |

ଝାନସୀ ଦୁର୍ଗକୁ ଫିରିଙ୍ଗି ଫଉଜ କରିଥିଲେ ଅଧିକାର,

ଗାଆଁଗାଆଁ ବୁଲି ଗୋରା ସରକାର ବିରୁଦ୍ଧେ କଲେ ପ୍ରଚାର |

ଚନ୍ଦନ ହଜୁରୀ ଇଙ୍ଗିତରେ ପ୍ରଜାକଲେ ଦିନେ ଆକ୍ରମଣ,

ଫେରିଲା ଝାନସୀ ରାଣୀଙ୍କ ହାତକୁ ଥମିଲା ଭୀଷଣ ରଣ |

ବରଷକ ପରେ ବଢାଇ ଫଉଜ ଫିରିଙ୍ଗି ଆସିଲେ ମାଡ଼ି,

ଚନ୍ଦନ କହିଲେ-ନୁଇଁବାନି ମଥା ମରିବା ପଛକେ ଲଢି |

ବିଗୁଲ ବାଜିଲା ଲଢେଇ ଚାଲିଲା ରଣଚଣ୍ଡୀ ବେଶ ରାଣୀ,

ପାଶେ ପାଶେ ରହି ଚନ୍ଦନ ହଜୁରୀ ଦିଅନ୍ତି ଉତ୍ସାହ ବାଣୀ |

ସାତଦିନ ମହାସମର ଶେଷରେ ପ୍ରାଣଦେଲେ ଲକ୍ଷ୍ମୀବାଈ,

ପରାଭବ ଦେଲେ ଫିରିଙ୍ଗି ଫଉଜ ବିଦ୍ରୋହୀଙ୍କୁ ଧରିନେଇ |

ଧରି ପାରିଲେନି ଚନ୍ଦନକୁ କେହି ଜଗତ ଜାଣିଲା ମୃତ,

ସାତବର୍ଷ ପରେ ଫେରିଲେ ଚନ୍ଦନ ସଭିଙ୍କୁ କରି ଚକିତ |

ସିପାହୀ ପଣ୍ଡା ସେ ଚନ୍ଦନ ହଜୁରୀ ଛଦ୍ମନାମେ ରହିଥିଲେ,

ଚାଖି ଖୁଣ୍ଟିଆ ସେ ବିଦ୍ରୋହୀ ସଂଗ୍ରାମୀ ଓଡ଼ିଶା ମାନ ରଖିଲେ |,

000