ଓଡ଼ିଆ ଜାତିର ଲଢୁଆ ବୀର-33: ଲୋଚନା ସର୍ଦ୍ଦାର
ଓଡ଼ିଆ ଜାତିର ଲଢୁଆ ବୀର-33: ଲୋଚନା ସର୍ଦ୍ଦାର
ଘୁମୁସର ପୁଅ ଲୋଚନା ସର୍ଦ୍ଦାର ବାଣପୁର ରାଜ୍ୟ ଘର,
ତନ୍ତ୍ର-ମନ୍ତ୍ର ବିଦ୍ୟା ଧନୁ ଚାଳନାରେ ଧୂରନ୍ଦର ବୀରବର ।
ଛାତିରେ ଭରିଛି ସିଂହର ସାହସ ବାହୁରେ ହାତୀର ବଳ,
ଧନୁ-ତୀର ଗୁଳି ଦେହରେ ଗଳେନା ପିଇଛି ଅକାଟ ଜଳ ।
ପଞ୍ଚୁଆ ଫତୁରୀ ଇଂରେଜ ହଟାଅ କନ୍ଧମେଳି କଥାଶୁଣି,
ଗରଜି ଉଠିଲେ ବୀର ନାଗବଚା ଉଠାଇ ନିଜର ଫଣୀ ।
ପାଟଶାଣୀ ପୁଅ କୃତ୍ତିବାସ ବୀର ବିପ୍ଲବର ସେନାପତି,
ଲୋଚନା ସର୍ଦ୍ଦାର କାୟା ସଙ୍ଗେ ମାୟା ଯୁଦ୍ଧରେ ରହିଲେ ମାତି ।
ବଣ ପାହାଡ଼ର ଘାଟି-ଖୋଲ ଦେଖି ଲୁଚାଇ ରଖିଲେ ଅସ୍ତ୍ର,
ଗରିଲା ଯୁଦ୍ଧରେ ଫିରିଙ୍ଗି ସେନାଙ୍କୁ ମାରି କଲେ ଛାରଖାର ।
କୃତ୍ତିବାସ ବୀର ଧରା ପଡ଼ିଗଲେ କପଟୀ ଶ୍ଵଶୁର ହାତେ,
ଗୁହାରୁ ବାହାରି ନିଜେ ବନ୍ଦୀହେଲେ ପ୍ରଭୁଭକ୍ତି ରଖି ଚିତ୍ତେ ।
ବିଚାର ଶେଷରେ କନ୍ଧ ଲୋଚନାର ଖଲାସ ହୁକୁମ ହେଲା,
ମୋର ପ୍ରଭୁପାଇଁ ଯିବିନାହିଁ କାହିଁ ଲୋଚନା ଉତ୍ତର ଦେଲା ।
କୃତ୍ତିବାସ ସଙ୍ଗେ କଳାପାଣି ଗଲେ ଜଡ଼ି-ବୁଟି ମନ୍ତ୍ରଧରି,
ମାଟି ମାଆ ଦୁଃଖ ଦେଖିବେନି ବୋଲି ଆସିଲେନି ଦେଶଫେରି ।
ଇତିହାସ କହେ ଧନ୍ୟ ସେ ଲୋଚନା ଧନ୍ୟ ତାଙ୍କ ଦେଶପ୍ରେମ,
କନ୍ଧ ସମାଜର ମଉଡ଼ମଣି ସେ ଅମର ଲୋଚନା ନାମ ।