ଓଡ଼ିଆ ଜାତିର ଲଢୁଆ ବୀର-11: ଚକ୍ରଧର ଜେନା

ନରସିଂହ ଗଡ଼ଜାତ ରାଜ୍ୟ ରାଜା ତ ନାମକୁ ମାତ୍ର,

ଫିରିଙ୍ଗି ଶାସନ ହୁକୁମ ମାନନ୍ତି ଯୋଡ଼ି ବେନି କରପତ୍ର |

ବେଠିରେ ଖଟେଇ ମଜୁରି ନଦେଇ କରୁଥିଲେ ଅତ୍ୟାଚାର,

ଅଶାନ୍ତି ବଢିଲା ମଣ୍ଡଳ ଗଢିଲା କମ୍ପେ ନରସିଂହପୁର |

ପ୍ରଜାମଣ୍ଡଳକୁ ଦବାଇ ଦେବାକୁ ଫିରିଙ୍ଗି ଦେଲେ ପୁଲିସ,

ମଣ୍ଡଳ ମୁଖିଆ ନିଷ୍ପତି କରିଲେ ହୋଇବ ନାହିଁ ସାଲିସ |

ବାଲିଝରି ଗାଆଁ ହାଡୁଆ ନାଳକୁ ଗଲେ ଠେଙ୍ଗା ବାଡ଼ି ଧରି,

ପ୍ରଜା ମଣ୍ଡଳର ଜୟଧ୍ଵନି ଦେଲେ ରାଜାଙ୍କୁ ଧିକ୍କାର କରି |

ଫଉଜ ଆସିଲେ ବନ୍ଧୁକ ସଜେଇ ନେତା ହେଲେ ଆଗଭର,

ଲୋକନାଥ, ଭାନୁ ଆର୍ତ୍ତ, ଚିନ୍ତାମଣି ତାଙ୍କ ଆଗେ ଚକ୍

Advertisement

ରଧର |

ମୁଣ୍ଡରେ ପଗଡ଼ି ହାତେ ଠେଙ୍ଗା-ବାଡ଼ି ଅଣ୍ଟିରେ ପଥର ଭରି,

‘ଫେରିଯାଅ ତୁମେ ଫିରିଙ୍ଗି କୁକୁର’ ପକାଇଲେ ନେତା ହୁରି |

ନକରି ଖାତର ହୋଇ ତରବର ପୁଲିସ ଆସିଲେ ମାଡ଼ି,

ଗାଆଁଲୋକ ଯେତେ କ୍ରୋଧଭରି ମନେ ଉଠେଇଲେ ଠେଙ୍ଗାବାଡ଼ି |

ଆଗ ଚକ୍ରଧର ଛାଡ଼ିଲେ ପଥର ତା’ପରେ ମାତିଲେ ଲୋକେ,

ପଥର ମାଡ଼ରେ ଫିରିଙ୍ଗି ଫଉଜ ଆହତ ହୋଇଲେ ଥୋକେ |

ଧାଏଁଧାଏଁ କରି ଆସିଗଲା ଗୁଳି ନେଲା ଚକ୍ରଧର ପ୍ରାଣ,

ଗୁଳିମାଡ଼ ଖାଇ ବଞ୍ଚିଗଲେ ପୁଣି ନେତା ଆଉ ପାଞ୍ଚଜଣ |

ଭୁଲିହେବ ନାହିଁ ଅମର ସହିଦ ବୀର ଚକ୍ରଧର ନାଆଁ,

ମନେ ପକାଉଛି ସହିଦ ମୀନାର ବାଲିଝରି ବୀରଗାଆଁ |