ଓଡ଼ିଆ ଜାତିର ଲଢୁଆ ବୀର- 09: ଚକରା ବିଷୋୟୀ-ଡକ୍ଟର କୃତ୍ତିବାସ ନାୟକ

ଘୁମୁସର ରାଜ୍ୟ ଅଙ୍ଗୋଲ ଗାଆଁର ବେଣିଆ କନ୍ଧ ଜାତି,

ଇଂରେଜ ବିରୋଧୀ ଶ୍ୟାମ ବିଷୋୟୀ ସେ ଲଢିଲେ ଫୁଲାଇ ଛାତି |

ନୃଶଂସ ଫଉଜ ନିର୍ମମ ଭାବରେ ଶ୍ୟାମକୁ କରିଲେ ହତ୍ୟା,

କମଳ ବିଷୋୟୀ ପ୍ରତିଶୋଧ ପାଇଁ ସାଜିଲେ ବିଦ୍ରୋହୀ ନେତା |

ଶ୍ୟାମ ସାନଭାଇ କମଳଲୋଚନ ରଖିଲେ ବିଦ୍ରୋହ ତେଜି,

ନଅବର୍ଷ କାଳ ଲଢିଲଢି ବୀର କାରାଗାରେ ଗଲେ ହଜି |

ଘୁମୁସର କନ୍ଧ ନିଜ ଦାବିନେଇ ମାତିଲେ ହୋଇ ପ୍ରବଳ,

ଚକରା ବିଷୋୟୀ ସଂଗ୍ରାମ ଚଳାଇ କଲେ ଶାସନ ଅଚଳ |

ଗରିଲା ଲଢେଇ ରଣ କୌଶଳେ ଦେଶହେଲା ଥରହର,

ବଡ଼ଲାଟ ନିଜେ ଆଦେଶ କରିଲେ-ଚକରାକୁ ବନ୍ଦୀକର |

ଚକରା ଚକରା ଚହଳ ପଡ଼ିଲା ଚତୁର ଚକରା କାହିଁ ?

ପାହାଡ଼ ପର୍ବତ ଘଞ୍ଚ ଜଙ୍ଗଲରେ କେଉଁଠି ତ ମିଳୁନାହିଁ |

ଘୁମୁସରଠାରୁ ଜୟପୁର ଯାଏ ତେଲନଦୀ ଉପତ୍ୟକା,

ଆଜି କଳାହାଣ୍ଡି କାଲିକୁ ଖେମୁଣ୍ଡି ସବୁଠି ଚକରା କଥା |

ଆତଙ୍କ ଆଶଙ୍କା ଘେରି ରହିଥିଲା ଦଶବର୍ଷ ଗଲାବିତି,

ସକଳ ଯୋଜନା ବିଫଳ ହୋଇଲା ଭାଙ୍ଗିଲା ଶାସନ ଭିତ୍ତି |

କେତେ ସହଯୋଗୀ ଦେଲେ ପ୍ରାଣବଳି ନୂଆଁଇଲେ ନାହିଁ ଶିର,

ଚକରା ବିଷୋୟୀ ଚକମା ଦେଖାଇ ହୋଇଲେ ଜାତୀୟ ବୀର |

ପାଇଲେନି କେହି ଧରି ସେ ବୀରଙ୍କୁ ଅନ୍ତର୍ଦ୍ଧାନ ହୋଇଗଲେ,

ସିପାହୀ ବିଦ୍ରୋହ ଆସିଲା ତା’ପରେ ତାଙ୍କୁ ସବୁ ଭୁଲିଗଲେ |