🙏ଓଁ ନମଃ ଭଗବତେ ବାସୁଦେବାୟ 🙏

ମଙ୍ଗଳା ଚରଣ

"କ" ଠାରୁ "କ୍ଷ "

ଯ, ର, ଳ, ୱ, ସ, ଷ, ଶ,ହ, କ୍ଷ

ରାଗ... ଚୋଖି

(ଯ )

ଜନମ ଭୂମି ଓଡିଶା  ଜାତିରେ କୁଳୁତା ଚଷା

ନରସିଂହପୁର ମୌଜା ବାହାଳୀ ଗ୍ରାମେ l

ଜଗତ ଜାଲ ଫିସାଦ  ଗୁରୁପାଦେ ହେବ ମୋଦ

ନମେ ଗୁରୁ ପଦ୍ମନାଭ ପଦ୍ମଚରଣେ l

ଯତିପାତ ଲେଖା ନିୟମ

ଯାହା ବତାଇଲେ ଗୁରୁ ପଦ୍ମ ଚରଣ l

(ର )

ରହି ନାହିଁ କେହୁ ଭବେ  ନା କେହୁ କେବେ ରହିବେ

ଜୀବ ଅଭିନେତା ନାଟକ ଏ ଜୀବନ l

ରଜନୀ ଦିବସ ଗଣ୍ଠି  ବ୍ରହ୍ମରୁ ବିଲୟ ସୃଷ୍ଟି

ସର୍ଲିପ୍ତେ ଉଦେ ନିର୍ଲିପ୍ତେ ହୁଅନ୍ତି ଲୀନ l

ରସନା ରଟୁ ଗୁରୁପଦେ

ରହୁ ମନ ସଦା ରଙ୍ଗ ରାଜୀବ ପାଦେ l

(ଳ )

ଲକ୍ଷ୍ୟରେ ଦେବା ଉପମା  ଅନନ୍ତ ଯାର ମହିମା

ମହୀ ମଧ୍ୟେ ଛନ୍ତି ଯେତେ ମହତ ଜନ l

ଲକ୍ଷ୍ୟକରି ନପାରନ୍ତି   ଆତ୍ମା ସ୍ଥିତି ଅବସ୍ଥିତି

ରଙ୍ଗ, ରୂପ, ଗନ୍ଧ, ସ୍ୱାଦ, ଆକାର, ଚିହ୍ନ l

ଲାଭ ଲଭିବାର ଆଶାରେ

ଲକ୍ଷ୍ୟ ବିଲକ୍ଷ୍ୟ ହୁଅଇ ମୋହ ପାଶରେ l

(ୱ )

ବିନାଶର ଉପଗତ  ବୁଦ୍ଧି ହୁଏ ବିପରୀତ

ବିଚାର ବିହୀନ ପ୍ରାୟ ହୁଅଇ ପ୍ରାଣୀ l

ବୁଦ୍ଧି ହୁଏ ଜ୍ଞାନ ଭ୍ରଷ୍ଟ  କୁଳଧର୍ମ କରେ ନଷ୍ଟ

ଉତ୍ତମ, ମଧ୍ୟ, ଅଧମ ସମାନ ଗଣି l

ବିଭୁ ପାଦେ ରହେ ଯା ମତି

ବିଜ୍ଞ ସେ ବିନାଶ ସୃଷ୍ଟି ସମାନ ଚିନ୍ତି l

(ସ )

ସରସ ଯେ ପ୍ରେମ ରସ  ମତରେ ମତି ହରଷ

ଚିନ୍ତେ ମୁଁ ପାନାର୍ଥେ ଚିନ୍ତାମଣୀଙ୍କ ରସ l

ଶକ୍ତିମୟ ଭଗବାନ  ଅଭୟ ପ୍ରଦାନ ନାମ

ଶକତି ନାହିଁ ମୋହର ବର୍ଣ୍ଣିବି ଯଶ l

ସୁସାଧୁ ଜ୍ଞାନୀଜନ ଭାବ l

ସଙ୍ଗେ ମତି ମିଶୁ ମୋର ହେ ବାସୁଦେବ l

(ଶ )

ଶକ୍ତିରୁ ସୃଷ୍ଟି ବ୍ରହ୍ମାଣ୍ଡ  ଆବର ସକଳ ପିଣ୍ଡ

ଶକ୍ତିର ସୃଷ୍ଟି ହୁଏନା ନାହିଁ ବିନାଶ l

ସଂସାରେ ଶକ୍ତି ବିହରେ  ଜଡ଼ ଚେତନ ରୂପରେ

ଭିନ୍ନଭିନ୍ନ ରୂପେ ରୂପାନ୍ତରେ ପ୍ରକାଶ l

ସକଳ ଶକ୍ତି ପରିମାଣ

ସର୍ବଦା ବିଶ୍ୱବ୍ରହ୍ମାଣ୍ଡେ ଅଟେ ସମାନ l

(ଷ )

ଷଡ଼ଊର୍ମି ମଧ୍ୟେ ପ୍ରାଣ  ପ୍ରକୃତି ସଙ୍ଗେ ମିଶିଣ

ଜୀବକୁ ବାନ୍ଧି ରଖନ୍ତି ମର ଦେହରେ l

ସକଳ ଇନ୍ଦ୍ରିୟ ଗଣ  ପ୍ରକୃତି ସଙ୍ଗେ ମିଶିଣ

ଜୀବେ ପ୍ରେରିତ କରନ୍ତି ମାୟା ମୋହରେ l

ସମ୍ମୋହନ ହୁଅଇ ଜୀବ

ସୁ ସଙ୍ଗ ନଥିଲେ ନମିଳେ ବାସୁଦେବ l

(ହ )

ହେ ହରି ନନ୍ଦ ନନ୍ଦନ  ହେ କୃଷ୍ଣ ମଧୁସୂଦନ

ହେ ନିକୁଞ୍ଜ ବିହାରୀ ମୁକୁନ୍ଦ ମୁରାରୀ l

ହେ ମାଧବ ରାଧାପତି  ସଚ୍ଚିଦାନନ୍ଦ ଶ୍ରୀପତି

ମଦନ ମୋହନ ଗୋବିନ୍ଦ ଦଇତାରୀ l

ହେ କେଶବ ରୁକ୍ମଣୀ ନାଥ

ହୃଦେ ଜ୍ଞାନ ଦିଅ ଗୀତାଗ୍ରନ୍ଥ ସତ୍ପଥ l

(କ୍ଷ )

କ୍ଷମିବ ମୋ ଦୋଷାଦୋଷ  ବିବୁଧ ଜ୍ଞାନୀ ବିଦୂଷ

ଅଜ୍ଞାନୀ ମୁଁ ବୟସ ମୋର ଉନତ୍ରିଂଶ l

କ୍ଷେତ୍ରଜ୍ଞ ମୂରତି ପୟ  ପ୍ରକାଶୁ ମୋହର ଲୟ

କ୍ଷିତିରେ ରହୁ ନରହୁ ମୋହର ଯଶ l

କ୍ଷମାନିଧିଙ୍କ ପଦ୍ମପାଦେ

କ୍ଷମ ଅଧମ ଶ୍ରୀକାନ୍ତ ଚରଣ ବନ୍ଦେ l