ଓଲଟ ପାଲଟ

ସୁଧାର ଗାଈ ଉଦାର ଆଈ ଦୁହିଙ୍କ ଦଶା ଏକା,

ଫଳନ୍ତି ଗଛ ଖାଏ ଖପଡ଼ ମାରନ୍ତି ପିଲେ ଟେକା |

କେଡ଼େ ବିରାଟ ବରଗଛରେ ଫଳୁଛି ଟିକିଫଳ,

ଲତାରେ ଫଳେ ତରଭୁଜଟି ବିରାଟ ରୂପ ତା'ର |

ବରଫଳର ବକଟେ ମଞ୍ଜି ମଣିଷ ଖାଏ ନାହିଁ,

ଲଙ୍କା ଆମ୍ବର ବିରାଟ ମଞ୍ଜି ସୁଆଦେ ଭରା ସେହି |

ଛୋଟ ସାପର ବିଷ ଅଧିକ ଅଜଗରର ନାହିଁ,

ହାତୀ ଖାଉଛି ଡାଳ ପତର କାଠ ଖାଉଛି ଉଈ |

ମାଡ଼ଠୁଁ ବେଶି କଷ୍ଟ ଲାଗୁଛି ଅପମାନର ବ୍ୟଥା,

ଗୁଳିଠୁଁ ବେଶି ଯନ୍ତ୍ରଣା ଦିଏ କହିଲେ କଟୁକଥା |

ବିପଦ ବେଳେ ଆହା ପଦିଏ ଲାଗେ ଚନ୍ଦନ ପରି,

ଦେହବଳଠୁଁ ମନର ବଳ ଦୁଃଖକୁ ନିଏ ହରି |