ଓଡିଆଣୀ
ଓଡିଆଣୀ
କଲ୍ୟାଣମୟୀ କଲ୍ୟାଣୀ ଓଡିଆଣୀ
ସେହି ସର୍ବ ସୁଲକ୍ଷଣୀ ।
ଓଡିଆଣୀ ତାର ଓଡିଆ ଚଳଣି
ନିଏ ଜନ ମନ କିଣି ।୧।
ଶାଶୁ ଶଶୁରଙ୍କ କଥାକୁ କେବେବି
ଦିଏ ନାହିଁ ସେ ଏଡାଇ ।
ସ୍ୱାମୀ ତାର ସ୍ୱାଭିମାନର ପ୍ରତୀକ
ତାଙ୍କରି କଥା ମାନଇଁ ।୨।
ପିଲାଙ୍କର କଥା ନିଜେ ସେ ବୁଝଇ
ରାତି ନ ପାହୁଣୁ ଉଠେ ।
ସମସ୍ତେ ଶୋଇବା ପରେ ସେ ଶୁଅଇ
ଆନନ୍ଦରେ ଘରେ ଖଟେ ।୩।
ବୁଝିଛି ସଭିଏଁ ତାହାର ନିଜର
ପର ବୋଲି କେହି ନାହିଁ ।
ବନ୍ଧୁ ପରିଜନ ସଭିଙ୍କୁ ଆଦର
ସେନେହ ସଦା ଦିଅଇ ।୪।
ସରଳତାର ପ୍ରତୀକ ଓଡିଆଣୀ
ସୁନ୍ଦର ତା ପରିଧାନ ।
ଓଡିଶୀ ବସନ ଓଡିଆ ଭୂଷଣ
ମୋହେ ସଭିଙ୍କର ମନ ।୫।
ନୃତ୍ୟରେ ନିପୁଣା ହେଲେ ଓଡିଆଣୀ
ଓଡିଶୀ ପରିବେଷଣ ।
କରି ସିନା ଅଭିଭୂତ କରିଥାଏ
ବିଶ୍ୱବାସୀଙ୍କର ମନ ।୬।
ଭଞ୍ଜଙ୍କର କୋଟି ବ୍ରହ୍ମାଣ୍ଡସୁନ୍ଦରୀ
ପ୍ରେମ ସୁଧାନିଧି ସେହି ।
ଲାବଣ୍ୟବତୀ ସେ ରସପଞ୍ଚକର
ନାୟିକା ବୋଲାଇ ଥାଇ ।୭।
ଓଡିଆଣୀ ପିଠାପଣା ସିଦ୍ଧହସ୍ତା
ତା ସମ ହୋଇବ କିଏ ?
ଘରକରଣାରେ ଓଡିଆଣୀ ସମ
କହ ହେବ ଆଉ କିଏ ?୮ ।
ଲକ୍ଷ୍ମୀ ନାରାୟଣୀ ନିଜେ ଓଡିଆଣୀ
ନାହିଁ ଏଥିରେ ସନ୍ଦେହ ।
ତାଙ୍କୁ ତ୍ୟାଗ କରି କି ଦଶା ଭୋଗିଲେ
ଦୁଇ ଭାଇ ତୁମେ କହ ?୯।
ଲକ୍ଷ୍ମୀ ପୁରାଣରେ ବର୍ଣ୍ଣନା ହୋଇଛି
ଓଡିଆଣୀର ଲକ୍ଷଣ ।
ପଢ ସୁଧୀ ଜନେ ଆଚରଣ କର
ଧନ୍ୟ ହୋଇବ ଜୀବନ ।୧୦।
ଓଡିଆଣୀ ଗୁଣ କେତେ ମୁଁ ଗାଇବି
ଗାଇଲେ ସରିବ ନାହିଁ ।
ସାଗର ବାଲୁକା କେ ଗଣି ପାରିବ
ଏତେ କା ଶକତି କାହିଁ ?୧୧।