ଓଡ଼ିଆ ପୁଅ
ଓଡ଼ିଆ ପୁଅ
ବିରଜା ମାଟିର ଓଡ଼ିଆ ପୁଅ ମୁଁ
ମୁଣ୍ଡରେ ବିଜୟ ଟୀକା
ଉତ୍କଳ କୋଶଳ କଙ୍ଗୋଦ କଳିଙ୍ଗ
ପ୍ରଦେଶ ଉଡ୍ର ଓଡିଶା ।
ପ୍ରଭୁ ଲିଙ୍ଗରାଜ ବାବା ଲୋକନାଥ
ସ୍ୱୟମ୍ଭୁ ଉଦୟାଚଳ
ପତିତପାବନ ଶ୍ରୀପୁରୁଷୋତ୍ତମ
ଶ୍ରେଷ୍ଠ ଧାମ ନୀଳାଚଳ ।
ଚତୁର୍ଦ୍ଧାମୂରତି ମୁକତି କୈବଲ୍ୟ
ମହାପ୍ରଭୁ ଜଗନ୍ନାଥ
ଜୀବନ ସଞ୍ଚରେ ମୋ ପାଣିପବନ
ପ୍ରାଣସିକ୍ତ ସୁରଭିତ ।
ଧୋଇଦିଏ ପାଦ ଉଚ୍ଛଳ ଜଳଧି
ପ୍ରବାହିତ ସ୍ରୋତସ୍ୱନୀ
ହସେ ବିଲବନ ସୁନାର ଫସଲ
ଓଡ଼ିଶା ମୋ ରାଜାରାଣୀ ।
ମୋ ମାଟିର ପୁଅ ଓଡ଼ିଆ ପାଇକ
ଉଷୁମ ରକତ ଢାଳି
ଉଡାଇଥିଲା ସେ ବିଜୟ କେତନ
ଗଙ୍ଗାଠାରୁ ଗୋଦାବରୀ ।
ନୃତ୍ୟ ଗୀତ କଳା ଉତ୍କର୍ଷ ଭାସ୍କର୍ଯ୍ୟ
ଓଡ଼ିଶା ବୟନ ବାନ୍ଧ
ଆମ ପରମ୍ପରା ନୈ।ବାଣିଜ୍ୟ ଗାଥା
ଅଟେ ପୁରାଣ ପ୍ରସିଦ୍ଧ ।
ଜାଗି ଉଠେ ମନେ ପୂରୁବ ଐତିହ୍ୟ
ଆକାଶେ ପୁଣ୍ୟ ପ୍ରଦୀପ
ଭାସି ଯାଆ ମୋର ପଟୁଆର ନାଆ
ମନାସେ ଶୁଭ କାର୍ତ୍ତିକ ।