ଓଡ଼ିଆ ମୁଁ

ଓଡିଆ ବୋଲି ମୁଁ କରୁଛି ଗରବ

ପୁଅକୁ ପଠାଏ କନଭେଣ୍ଟ

ସାନ ଝିଅ ମୋର ଇଙ୍ଗିଲିଶି ଲେଖେ

ଜାଣେ ନାହିଁ ଅ ଆ ବେଣ୍ଟ ।

ଘରଣଟି ମୋର ଭାରି ପାରିବାର

ଡାକୁଅଛି ମୋତେ ହାଜବେଣ୍ଟ

ଗେଲେଇ ଶାଳୀଟି ଫୁଲେଇ ବିଉଟି

ପିନ୍ଧୁଅଛି ଫଟା ହାପ୍ ପେଣ୍ଟ ।

ଶାଶୁ ମାଆ ମୋର ଗୋଲାପୀ ଅଧର

ମାରନ୍ତି ଦେହରେ ଫଗ୍ ସେଣ୍ଟ,

ଶଶୁରଙ୍କ ପ୍ରିୟ ଜିନ୍ ପେଣ୍ଟସାର୍ଟ

ଦରଜୀକୁ ଦିଅନ୍ତିନି କଣ୍ଟ ।

ଶାଳକର ମୋର ଚିକ୍କଣ ଫିଗର

କଲେଜରେ ସଦା ଆପସେଣ୍ଟ

ସୁନ୍ଦରୀ ଟୋକିଟେ ଫସେଇ ଦେଇଛି

ଅଦାଲତେ ହେବ ଜଜମେଣ୍ଟ ।

ଭଉଣୀ କଥା ମୋ ନ କହିବା ଭଲ

ପାଠରେ ହଣ୍ଡ୍ରେଡ ପରସେଣ୍ଟ

କୁଟାକୁ ଦିଖଣ୍ଡ କରେ ନାହିଁ ସେଇ

କହିଲେ ମାରିବ କଅମେଣ୍ଟ ।

ପ୍ରିୟ ଭାଇ ମୋର ଚେହେରା ସୁନ୍ଦର

ମନଟା ବି ତାର ଭାରି ଆଣ୍ଟ

କଥା କଥାକରେ କଳି କରି କହେ

ଭାଇନା ଜଲଦି ଭାଗବାଣ୍ଟ ।

ବାପା ମାଆ ବୋଲି ନାହିଁ ସମ୍ବୋଧନ

ଆଦରେ ଡାକୁଛୁ ପେଏରେଣ୍ଟ

ସନମାନ ଦେଉ ଲାଭ ଦେଖି ତାଙ୍କୁ

ଯେମିତି ବୀମାର ଏଏଜେଣ୍ଟ ।

ଗାଆଁ ଘର ମୋର ଛାଡି ଆଇଲି ମୁଁ

ସହରେ ରହୁଛି ଦେଇ ରେଣ୍ଟ

ପୂଜାପଦ୍ଧତିରେ ଲାଗୁନାହିଁ ମନ

ସବୁ କାମ ମୋର ଅରଜେଣ୍ଟ ।

ଶାଗ ପଖାଳକୁ ନାକ ଟେକୁଅଛି

ଲାଗୁନାହିଁ ଭଲ ମୁଢିଘାଣ୍ଟ

ଗୀତା ଭାଗବତ ପଢୁନାହିଁ ଜମା

ବଢିଯାଇଛି ମୋ ଟାଆଲେଣ୍ଟ ।

କେମିତି ନିଜକୁ ଓଡିଆ କହୁଛି

ସବୁ ଦେଖି ଅଛି ସାଇଲେଣ୍ଟ

ସୁଧାରିବି ଆଉ ନିଜେ ସୁଧୁରିବି

ନ ହେଲେ ଭବିଷ୍ୟ ଭାୟଲେଣ୍ଟ ।